اسلام آباد۔28اکتوبر (اے پی پی): مزن وزیر محمد شہباز شریف 29اکتوبر ءَ بگر داں 30 اکتوبر ءَ سعودی عرب ءِ سرکاری تر ءُ تاب ءَ کنت۔ دو شمبے ءِ روچ ءَ درئی کارانی کارگس ءِ نیمگ ءَ جاڑی بوتگیں بیان ءِ رد ءَ مزن وزیر ریاض ءَ برجم دارگ بوھوکیں آیوکیں سرمایہ کاری ءِ گامگیج ءِ ھشتمی ایڈیشن ءَ بھر زوری کنت ءُ مزن وزیر ءِ ھمراھی ءَ کابینہ ءِ ھاسیں باسک ھم ھوار بنت۔ آیوکیں سرمایہ کاری ءِ گامگیج ملک آنی واستہ یک ھاسیں پلیٹ فارم ءِ بستار ءَ کار کنت کہ آ اقتصادی طاقت ءِ درشان ءَ کن اَنت، درملکی سرمایہ کاری ءَ را را وتی نیمگ ءَ راجینگ ءُ پائیدار آیوکیں وھد ءِ جوڑ کنگ ءِ واستہ گپ ءُ تران ءَ گوں بندوک بہ بنت۔ اے سال ءِ آیوکیں سرمایہ کاری ءِ گامگیج ءِ بنگپ ”لامحدود افق: مرچی سرمایہ کاری، باندا ءِ شکل دیگ“ اِنت کہ ایشی ءِ تہ ءَ مصنوعی ذہانت، روبوٹکس، وانگ ءُ زانگ، توانائی، خلاء، مالیات، جان سلامتی ءُ پائیداری ءِ ھاتر ءَ ھاسیں جیڑھانی گیش ءُ گیوار ءِ وڑ ءَ جھان ءِ سرمایہ کاری ءِ سر ءَ دلگوشی دیگ بیت۔ بیان ءِ رد ءَ مزن وزیر ءَ گوں سعودی ولی عہد ءُ مزن وزیر محمد بن سلمان ءُ اے دگہ مزنیں سعودی کارندہ آں گوں ھاسیں دو نیمگی گپ ءُ تران ءِ امیت انت۔ فریق پاکستان ءُ سعودی عرب ءِ نیام ءَ اقتصادی ءُ اسٹریٹجک شریکداری ءِ بابت ءَ گپ ءُ تران کن انت ءُ اقتصادی، توانائی ءُ دیمپانی ی شوبگاں دو نیمگی کمک ءِ سرا ھیال ءُ لیکہ کن انت۔ مزن وزیر ءَ را آیوکیں سرمایہ کاری ءِ گامگیج ءِ 8می ایڈیشن کانفرنس ءَ بھر زوری کنوکیں رہشون ءُ کاروباری مردم آں گوں گند ءُ نند ءِ ہم امیت انت۔
