اسلام آباد۔ 28 اکتوبر (اے پی پی) وزیراعظم محمد شہباز شریف پارینے کہ ننے اواری اٹ پولیو کون آ چیلنج ءِ شکست تروئی ءِ، ہراتم اسکان پولیو ءِہمیشہ کن شکست تفنہ آسرات تولپنہ۔ دوشنبے نادے آ وزیراعظم آفس نا پریس ونگ آن جاری بیان نا رداٹ وزیراعظم محمد شہباز شریف نا کماشی ٹی انسداد پولیو نا بابت اہم دیوان اس اڈ ہلک۔ وزیراعظم پارے کہ ننے اواری اٹ پولیو کون آ چیلنج ءِ شکست تروئی ءِ، انشاء اللہ زوت پاکستان پولیو فری ملک اس جوڑ مریک، ہراتم اسکان پولیو ءِ ہمیشہ کن شکست تفنہ آسرات تولپنہ، پولیو نا چٹفنگ نا بابت حکومتی پولیو ٹیم نا کوشست ستاکڑزک۔ وزیراعظم کوآرڈی نیٹر قومی جان جوڑی ڈاکٹر مختار احمد بھرتھ ، فوکل پرسن انسداد پولیو عائشہ رضافاروق و سیکرٹری قومی جان جوڑی ءِ ساڑی آ انسداد پولوی مہم اٹی ملک اٹی پولیو آن زیات زہمی علاقہ غاتا دورہ ءِ کننگ نا پارت کرے۔ وزیراعظم انسداد پولیو مہم نا تھرڈ پارٹی آڈٹ کرفنگ و امیونیٹی گیپ نا بابت جوان ءُ حکمت عملی اس ترتیب تننگ نا ہم پارت کرے۔ وزیراعظم ءِ ملک اٹی ساڑی آ پولیو کیس و انسداد پولیو مہم نا بابت حوال اٹی پاننگاکہ ملک اٹی داوخت آ پولیو نا ایکٹیو کیس آتا کچ 41 مسنے، داکیس آتیان 25 کیس ہندن ءُ ہرافتا روٹین امیونائزیشن گچین اف، ملک انا ہرا علاقہ غاتیٹی چناتیٹی پولیو ویکسی نیشن نا کچ جوان ءِ ہموڑے پولیو نا تالانی کم ءِ۔ دیوان اٹی وزیراعظم نا کوآرڈی نیٹر قومی جان جوڑی ڈاکٹر مختار احمد بھرتھ ، وزیراعظم نا فوکل پرسن انسداد پولیو عائشہ رضافاروق و تعلقدار بڑزکو سرکاری آفیسر آک بشخ ہلکر۔
