اسلام آباد۔ 28 اکتوبر (اے پی پی) اسپیکر قومی اسمبلی سردار ایاز صادق پارینے کہ کنا ٹی وی انٹرویو ءِ اسہ اخبار اس مس کوڈ کرے، نن غٹ جج آتا شرف ءِ کینہ، غلط رپورٹنگ تینا ہی ادارہ نا ساکھ ءِ زہمی کیک، زموار ی اٹ بایدے رپورٹنگ مرے۔ دوشنبے نادے آ قومی اسمبلی نا دیوان نا بنا آ وقفہ سوج آتا بنامننگ آن مست اسپیکر قومی اسمبلی سردار ایاز صادق پارے کہ ای سلیم صافی ءِ پروگرام جرگہ ٹی انٹرویو تسٹ ، کنا ہیت ءِ اسہ پنی ءُ ہڑدے ئی مس کوڈ کرینے، نن عدالت نا فیصلہ غاتیا کس اسے نوٹیفائی و ڈی نوٹیفائی کپنہ بلکن الیکشن کمیشن الیکشن آن پد باسک آتا نوٹیفکیشن کیک و ضمنی الیکشن اٹ ہم ہنداوڑ ہی مریک، نوٹیفائی مروک آ تیان ایوان اٹ سوغند ہلنگک۔ اوپارے کہ غٹ ایشوتیا عدالت مدام الیکشن کمیشن آف پاکستان ءِ نوشتہ کیک۔ الیکشن کمیشن اوڑآ نوٹیفائی کیک تو ولدا ننا زمواری مریک کہ ننے انت ایکشن ہلوئی ءِ۔ اوپارے کہ تینا دا انٹرویو ٹی جے یو آئی (ف) نا اسہ زالبول باسک اسے نا درور تس کہ او ہفت دے کنے آ برسا کرے کہ سوغند ہلنگ کن ہلے، ای دا پاریٹ کہ الیکشن کمیشن آف پاکستان آن نوٹیفائی کرف۔ اوپارے کہ غٹ جج آتا شرف ءِ کیوہ، داوڑنا غلط رپورٹنگ ادارہ نا ساکھ ءِ زہمی کیک، زموار انہ صحافت بایدے کننگے۔
