اسلام آباد۔ 28 اکتوبر (اے پی پی) چیئرمین سینیٹ سید یوسف رضاگیلانی پارینے کہ ویلنٹینا مٹوینیکو نا دورہ ءِ پاکستان آن پاکستان و روس انا تعلقداری تے مون آدننگ کن پوسکن ءُ کسر ملنگک۔ سینیٹ سیکرٹریٹ آن جاری بیان نا رداٹ داخیال آتا درشانی ءِ او روسی فیڈریشن کونسل نا اسپیکر ویلنٹینا مٹوینیکوتون گپ وتران کرساکرے ہرا دوشنبے نادے آ داڑے ڈل اتون اوار پارلیمنٹ ہاؤس اٹی اوڑتون اوڑدہی کرے۔ اوڑدہی ٹی ہڑتوم آملک آتا نیام اٹ سفارتی ، زرگزرانی، واپاری و پارلیمانی تعلقداری تا مو ن آ دننگ نا بابت امور آ سرجمی اٹ گپ وتران کننگا۔ داوخت آ چیئرمین سینیٹ پارے کہ ویلنٹینا مٹوینیکونا دورہ ءِ پاکستان آن پاکستان وروس انا تعلقداری تے مون آ دننگ نا پوسکن ءُ کسر آوار مریک۔ اونا دورہ غان علاقائی امن، شونداری وشونہالی ءِ مون آ دننگ دوئی مریک ۔ سید یوسف رضاگیلانی 2010 اٹی تینا دورہ ءِ روس اٹی صدر ولادی میر پیوٹن تون تینا اوڑدہی و ہمووخت آ مروک آ معاہدہ غاتا ذکر ءِ کرسا پارے کہ پاکستان نا تیل و گیس انا بشخ آتون اوار انفراسٹرکچر نا گچینی کن روس انا کمکاری نا ستاءِ کینہ۔ پاکستان نا سینیٹ اٹی اسہ گچین پاکستان روس سنگتی گروپ اس جوڑ کننگانے۔ السی کہول آ رابطہ غاتے مون آ دننگ اٹ السی نمائندہ گچین راہشونی فراوان کننگ کیرہ۔ سید یوسف رضاگیلانی پارے کہ ہڑتوم آملک آتا نیام اٹ ساڑی آ واپاری کچ ءِ پین ودفنگ تون اوار چندی بشخ آتیٹی زرکاری نا مون آدننگ کن پوسکن وارخواہی تا پٹنگ نا گرج ءِ۔ نارتھ۔ساؤتھ ٹرانسپورٹ راہداری بھاز اہم ءِ۔ داوخت آ ویلنٹینا مٹوینیکو چیئرمین سینیٹ ءِ شاندار بیابخیری آ خراج تحسین پیش کرے و پارے کہ روس پاکستان تون تینا تعلقداری تے قدر انا نظر اٹ ہرک۔ پاکستان تون واپاری ، اقتصادی ، سفارتی تعلقداری تے پین مون آ دننگک۔ پاکستان اٹ زرکاری ٹی ودکی تون اوار چندی بشخ آتا نیام اٹ کمکاری ءِ ہم مون آدننگک۔ پاکستان و روس انا نیام اٹ تعلقداری تیا است جمی نا درشانی ءِ کینہ۔ اوپارے کہ پارلیمانی تعلقداری تا مون آدننگ آن نئے بیرہ ہڑتوم آملک آتا نیام اٹ واپار و زرکاری ءِ مون آ دننگک بلکن الس ءِ اسہ ایلو نا خڑک آ بننگ اٹی ہم کمک رسینگک۔
