لندن۔ 07 ستمبر (اے پی پی) نائب وزیراعظم و بنجائی وزیر خارجہ اسحاق ڈار پارینے کہ حکومت برطانیہ غان بروک و ہنوک آ جہاز آتے زوت آن زوت بحال کننگ نا کوشست کننگ اٹی ءِ۔ پاکستان برطانیہ تون متکن آ شریداری ءِ بھاز اہمیت ایتک و ہڑتوم آکنڈآتا تعلقداری نا اصل وت پاکستانی پردیسیک ءُ۔ برٹش پاکستانی غٹ آن زیات پیدوار، متنوع و غٹ آن زیات گچین و متحرک پک مسنو ہرانئے بیرہ مہماندار ملک بلکن پاکستان نا شونداری ٹی ہم تینا کڑد ءِ ادا کننگ اٹی ءُ۔ برطانیہ ٹی پاکستانی کمیونٹی آن تران کرسا اوپارے کہ پی آئی اے نا جہاز آتا بحالی نا ویل ءِ ایسر کننگ کن برطانیہ نا ایوی ایشن اتھارٹی نا تازہ انگا گرج آتا رداٹ نن ہرممکن کوشست کرینن، داتسکان کہ نن کانوداٹی بدلی ہم کرینن۔ اوپارے کہ پاکستان تحریک انصاف (پی ٹی آئی) نا مسکوہی حکومت نا اسہ وزیراسے نا غیرزموارانہ بیان پاکستان نا غٹ جہاز آتے یورپ، برطانیہ و دیکی دنیا ٹی گراؤنڈ کرے۔ برطانیہ نا سرکاری دورہ غا ہنوک نائب وزیراعظم و بنجائی وزیر خارجہ اسحاق ڈار پارے کہ حکومت پاکستان ایئرلائنز ُ(پی آئی اے ) نا نجکاری و اسلام آباد انٹرنیشنل بالی پٹ انا آؤٹ سورسنگ نا پین اِرا گام گیج کننگ اٹی ءِ۔ اوپارے کہ داعمل ترندی اٹ مون آ ہِننگ ءِ و اومیت ءِ کہ دا بروک آ تُو انا 10 تاریخ اسکان پورو مریک۔ اوپارےکہ پاکستان برطانیہ تون متکن آشریداری ءِ بھاز اہمیت ایتک وہڑتوم آ کنڈآتا تعلقداری نا صل محور پاکستان پردیسیک ءُ۔ اوپارے کہ کنے یقین ءِ کہ برٹش پاکستانی غ آن زیات پیدوار، غٹ آن متنو ع و غٹ آن زیات موثر و متحرک پک مسنو ہرانئے بیرہ مہماندار ملک بلکن پاکستان نا شونداری ٹی ہم تینا کڑد ءِ ادا کننگ اٹی ءُ۔ اوداہیت ءِ مون آتخا کہ برٹش پاکستانی کمیونٹی برطانیہ ٹی اوورسیز کمیونٹی تیٹی سیاسی وڑاٹ متحرک کمیونٹی ہم ارے۔ ننتون کابینہ نا اِرا باسک، ہاؤس آف کامنز اٹی 15 باسک، ہاؤس آف لارڈز اٹی 11 باسک و سد آ کونسلرز و میئرز و ڈپٹی میئرزآک ءُ۔ 2013ء ٹی ملک انا بدترین زرگزرانی و سیکورٹی حالیت آتا ذکر ءِ کرسا نائب وزیراعظم پارے کہ بھلا جہانی مالیاتی ادارہ پاکستان نا زرگزران ءِ سیاسی وڑاٹ نزور ملک اس گونداکہ و اودے شش تُو انا تہہ ٹی ڈیفالٹ مننگ نا گڑتی ظاہرکریکہ۔ زرگزرانی مین آن پیش تمنگ اٹی اسہ دہائی آن زیات نا خت لگنگ نا خدشہ ہم ظاہر کننگاکہ ولے اقتدار اٹی بننگ نا بیرہ یک و نیم سال آن پد مسلم لیگ (ن) نا حکومت ملکی زرگزران ءِ سہی وڑاٹ دننگ اٹ سرسہب مس۔ نائب وزیراعظم 2022اٹی پی ٹی آئی حکومت نا کنڈآن پالیسی ٹی بدلی آ مایوسی نا درشانی ءِ کرے ہرانا سوب آن بیدادی و دہشت گردی ملک اٹی پدی بس۔
