پاکستان ایجوکیشن اینڈاؤمنٹ فنڈ انا ٹہیفنگ آن نیزگار اُراتا چناک بڑزکوتعلیم دوئی کننگ کیرہ، فنڈ اٹی بلوچستان نا ورناتیکن 20 درسد کوٹہ جتا کننگانے، وزیراعظم شہباز شریف

اسلام آباد۔ 20 اگست (اے پی پی) وزیراعظم محمد شہباز شریف پارینے کہ پاکستان ایجوکیشن اینڈاؤمنٹ فنڈ انا ٹہیفنگ آن نیزگار اُراتا چناک بڑزکو تعلیم دوئی کننگ کیرہ، پاکستان ایجوکیشن اینڈاؤمینٹ فنڈ اٹی بلوچستان نا ورناتیکن 20درسد کوٹہ جتا کننگانے۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او پاکستان آن تعلق تخوک آ یوکے نا پنی آ یونیورسٹی آف آکسفورڈ اٹی آکسفورڈ یونین نا پوسکن گچین مروک آ صدر اسرار خان کاکڑ تون گپ وتران کرساکرے ہراسے شنبے نادے آداڑے اوڑتون اوڑدہی کرے۔ وزیراعظم اسرار خان کاکڑ ءِ پیشن نا ملک پاکستان نا پن ءِ روشنا کننگ نا ستاءِ کرے۔ وزیراعظم پارے کہ اسرار کاکڑ کون آ لائخ ورناک ہی پاکستان نا پائیدار و روشنا آخبت نا ضامن ءُ۔ نا آکسفورڈ یونین نا صدر نا گچین کاری تیٹی بشخ ہلنگ و سرسہب مننگ نا ثابت قدمی و بدل مفروک عزم انا ڈیک ءِ۔ وزیراعظم پارےکہ ای پراومیت اُٹ کہ اسرارکاکڑ و داوڑکون آ لائخ پاکستانی ورناک ہندا وڑ جہانی کہول آ ملک انا پن ءِ روشنا کرسا کیرہ۔ بلوچستان نا پدسلوک علاقہ غان تعلق تخوک آ ورناتا سخت خواری آن تینا غٹ تعلیمی ریسہ غاتیٹی وظیفہ دوئی کننگ و بالآخر آکسفورڈ یونین کون آ بڑزکو تنظیم نا صدر گچین مننگ گمر ناقابل ءِ۔ پاکستان ایجوکیشن اینڈاؤمنٹ فنڈ اس ٹہیفنگانے۔ دانا سوب آن نیزگار اُراتا چناک بڑزکو تعلیم دوئی کننگ کیرہ۔ پاکستان ایجوکیشن اینڈاؤمنٹ فنڈ اٹی بلوچستان ناورناتیکن 20 درسد کوٹہ جتا کننگانے۔ اوڑدہی ٹی اسرارخان کاکڑ وزیراعظم ءِ آکسفورڈ یونین اٹی تران کننگ نا سلہ خلک۔ اسرار خان کاکڑ ورناتے واکدار کننگ و شونداری نا اسہ وڑ وارخواہی فراوان کننگ نا گام گیج آتیا وزیراعظم ءِ خراج تحسین پیش کرے۔ اوپارے کہ کنتون اوار پاکستان نا غٹ ورناک پاکستان نا شونداری ؎و شونہالی کن ہروڑنا خذمت آتیکن تیار ءُ۔