ایم پاکس نا بابت بالی پٹ و انٹری پوائنٹ آتیا سکریننگ و سرویلنس نا جوان ءُ نظام اس ساڑی ءِ، ڈاکٹر مختار احمد بھرتھ نا اسلام آباد بالی پٹ نا دورہ ءِ کننگ نا وخت آ گپ وتران

اسلام آباد۔ 19 اگست (اے پی پی) وزیراعظم نا کوآرڈی نیٹر جان جوڑی ڈاکٹر مختار احمد بھرتھ پارینے کہ پاکستان اٹی ایم پاکس نا کیس آتا بابت حالیت آک است جم ءُ، غٹ بالی پٹ  و انٹری پوائنٹ آتیا سکریننگ و سرویلنس ناگچین ءُ نظام اس ساڑی ءِ، پمز ہسپتال اٹی آئسولیشن وارڈ اس جتا کرینن۔ داخیال آتا درشانی ءِ او اسلام آباد انٹرنیشنل بالی پٹ نا دورہ ءِ کننگ نا وخت آ کرے۔ وزارت جان جوڑی نا کنڈآن جاری بیان نا رداٹ ڈاکٹر مختاراحمد بھرتھ ایم پاکس نا بست وبند آتا چاروکی ءِ او تینٹ کننگ اٹی ءِ۔ اودوشنبے نادے آ اسلام آباد بالی پٹ آ منکی پاکس ناسرویلنس نا جاچ ءِ ہلک۔ بالی پٹ آ بارڈر ہیلتھ سروسز ناعملہ ڈاکٹر مختار احمد بھرتھ ءِ تعلقدار گام گیج آتیا حوال تس۔ داوخت آ ڈاکٹر مختار احمد بھرتھ پارےکہ غٹ بالی پٹ و انٹری پوائنٹ آتیا اسکریننگ و سرویلنس نا گچین ءُ نظام ا س ساڑی ءِ۔ انٹرنیشنل ہیلتھ ریگولیشنز نا سلاہ و سوج آتیا عملدرآمد ءِ پک کننگ اُن۔ اوپارے کہ پاکستان اٹی ایم پاکس ناحالیت آک است جم ءُ ۔ پیشگی گام گیج آتا پبی چاروکی برجاءِ۔ ڈاکٹر مختار احمد بھرتھ پارے کہ اسلام آباد نا پمز ہسپتال اٹی آئسولیشن وارڈ اس جتا کننگانے۔ وزارت جان جوڑی حالیت آتیا سخت نظرتخانے۔ بنجا و صوبہ غاک اواری اٹ غٹ تر المی گام گیج آتے پک کننگ ءُ۔ اوپارے کہ دین و ناجوڑی تیان الس ءِ رکھ تخنگ نا پکاعزم کرینن۔