اسلام آباد۔ 19 اگست (اے پی پی) اسپیکر قومی اسمبلی سردار ایاز صادق 19 اگست 2014 آ پارلیمنٹ نا گھیڑ کننگ ءِ جمہوریت نا برخلاف اسہ گندہ ءُ سازش اس گوندسا پارینے کہ دا واقعہ نا اخس کہ مذمت ءِ کننگے کم ءِ، پارلیمنٹ نا عزت و شرف و رکھ ننا غٹ آ المی ءِ۔ دوشنبے نادے آاسپیکر قومی اسمبلی پارلیمنٹ آ جلہو نا 10 سال پورو مننگ آ تینا کلہو اٹی پارے کہ 19 اگست 2014 نا دے ملکی تاریخ اٹی تہاردے انا وڑاٹ یات تخنگک، 10 سال مست اینونادے پارلیمنٹ ہاؤس نا گھیڑ کننگ و اوڑآ جلہو کننگا، دا جمہوریت نا برخلاف گندہ ءُ سازش اس ئس داجلہو نا اخس کہ مذمت ءِ کننگے کم ءِ۔ اسپیکر پارے کہ پارلیمنٹ ملک انا بڑزکو آ ادارہ، جمہوریت نا بنداو و السی است خواہی تا ترجمان ءِ۔ ملک انا شونداری و السی راجی آسودہی پارلیمان نا سوگوی اتون گنڈوک ءِ۔ اوپارے کہ پارلیمنٹ نا عزت وشرف و رکھ ننا غٹ آ المی ءِ۔ اوپارے کہ 19 اگست 2014انتشار پسند زموار آک پارلیمنٹ آ جلہو کرسا اونا تقدس ءِ لتاڑار، کس اسے دُن ءُ گام اسے نا موکل تننگ مفک، داجلہو نئے بیرہ جمہوریت بلکن ریاست نا بنداوی تمبہ غاتیاہم کاری ءُ ضرب اس ئس۔ اسپیکر ہمووخت انا حکومت و پارلیمان نا دفاع کن سلوک آ سیاسی جماعت آتا کڑد انا ستا ءِ کرے و پارے کہ 2014 نا پرتشدد مچیک مچ آ دنیا ٹی پاکستان نا تشخص ءِ نسخان تسر و اونا سوب آن چین نا صدر ءِ تینا طے کروک دورہ ءِ پد بٹوئی تما۔ سردار ایاز صادق پارے کہ ملکی ویل آتے ایسر کننگ نا اسٹ انگا کسر جمہوریت و پارلیمنٹ تون وابستہ ءِ۔ اوپارے کہ پارلیمنٹ و جمہوریت ءِ سوگو کننگ نا مدام کوشست کرسا کیوہ، الس نا راجی آسودہی اولیت ءِ و پارلیمان دا فرض ءِ سرتننگ کن سنبرینگوک ءِ۔
