اسلام آباد۔ 05 اگست (اے پی پی) فیڈریشن آف پاکستان چیمبر آف کامرس اینڈ انڈسٹریز نا صدر عاطف اکرام شیخ پارینے کہ کشمیر نا ویل برصغیر پاک و ہند نا بشخنگ نا بے پورو ایجنڈا ءِ، 5 اگست 2019 آ کشمیری تا حق ءِ کُننگ نا ظالمانہ کوشست کننگا، بھارت نا دا گام مقبوضہ کشمیر نا جغرافیائی حیثیت ءِ بدل کننگ نا سازش اسے۔ داخیال آتا درشانی ءِ او یوم استحصال کشمیر نا وخت آ تینا اسہ بیان اسے ٹی کرے۔ اوپارے کہ بھارت بربریت نا کمک اٹ کشمیری تا تحریک حق خودارادیت ءِ توننگ کپک، ڈیہہ اٹی پائیدار امن وایمنی کن کشمیر نا ویل انا ایسری المی ءِ۔ اونا پاننگ ئس کہ بھارتی آئین نا آرٹیکل 370و 35 اے نا منسوخی جہانی کانود نا پاش آن پاش خلاف ورزیءِ، اقوام متحدہ نا قرارداد و کشمیری الس نا است خواہی تا رداٹ کشمیرنا ویل انا ایسر اس کشنگے، پاکستانی قوم انا کشمیری تتون بے مٹ تعلقداری ءِ۔ تحریک آجوئی نا مخ تفی ءِ برجاتخنہ۔ اوپارے کہ بزنس کمیونٹی جموں وکشمیر آ بھارت نا ناروا کوزہ و ظلم انا برخلاف ہرفورم آ توار بڑز کرساکیک۔
