اسلام آباد۔ 01 اگست (اے پی پی) نائب وزیراعظم و وزیرخارجہ سینیٹر محمد اسحاق ڈار پارینے کہ پاکستان زرگزرانی شونداری و سوگوی نا کنڈآ ہِننگ ءِ، کچ اٹنگا وسیلہ غاتیان پد ہم شونداری ڈٹ آتیا کاریم مننگ ءِ ، زرگزرانی سوگوی کن اصلاحات وخت انا اہم خواستءِ۔ داخیال آتا درشانی ءِ او پنچ شنبے نادے آ داڑے سیکورٹیز اینڈ ایکسچینج کمیشن آف پاکستان (ایس ای سی پی) نا ہیڈ آفس بلدنگ نا بنداو کن اڈہلوک دود آن تران کرساکرے۔داوخت آ وزیرخزانہ و محصولات سینیٹر محمد اورنگزیب، چیئرمین ایس ای سی پی عاکف سعید و ایس ای سی پی نا بانی چیئرمین شمیم احمد خان ئسک ہم ساڑی ئسر۔ نائب وزیراعظم پارے کہ ملک انا زرگزرانی شونداری کن وارخواہی ساڑی ءِ، نن ہروڑنا چیلنج آتون مون تننگ اُن، بیر ہ اڑاند آتے مر کننگ نا گرج ءِ۔ اوپارے کہ وزیراعظم محمد شہبا ز شریف نا کماشی ٹی حکومت تین پہ تینی واپار ناپالیسی آ ہِننگ ءِ، ملکی برآمد آتا مون آ دننگ حکومت نا بنداوی ایجنڈاءِ، پاکستان اسٹاک مارکیٹ ڈیہہ اٹی غٹ آن گچین ہِننگ ءِ۔ نائب وزیراعظم پارے کہ ہڑتوم آکنڈآتا و پیشن نا ملک آتون واپار ءِ مون آدننگ ننا چکار نا وت ءِ، ساڑی حکومت ملک ءِ خواتہ مننگ آن بچفے ،مایوسی تالان کروک آک بِنر پاکستان اسُل خواتہ مفک۔ اوپارے کہ وزیراعظم نا پورو چکار زرگزرانی اصلاحات و واپار نا مون آ دننگ آٹی ءِ، ملکی برآمد آتا مون آ دننگ ننا حکومت بنداوی ایجنڈا ءِ۔ اودااومیت نا درشانی ءِ کرے کہ سیکورٹیز اینڈ ایکسچینج کمیشن (ایس ای سی پی) ہیڈ آفس بلڈنگ نا تفنگ تخو ک آ مداٹی کننگک۔ داماڑی کن پلاٹ نا منظوری 2017 ٹی ننا ہمووخت انا حکومت تسوسس، ماڑی نا تفنگ اٹی پین تاخیر کننگپک۔ نائب وزیراعظم سینیٹرمحمد اسحاق ڈار پارے کہ ننا 2016 نا دور اٹی ملک انا ہرمسٹ آ اسٹاک مارکیٹ آتے ضم کننگا، 2013 آن 2017 ٹی دابابت کانو دآتیٹی اصلاحات کننگا۔ دود اٹی نائب وزیراعظم سینیٹر محمد اسحاق ڈار وزیرخزانہ و محصولات سینیٹر محمد اورنگزیب ، چیئرمین ایس ای سی پی عاکف سعید و ایلوفتے تون اوار ایس ای سی پی ہیڈ آفس بلڈنگ نا بنداو نا تختی نا نقاب کشائی ءِ کرے۔
