اسلام آباد۔ 01 اگست (اے پی پی) بنجائی وزیر خزانہ و محصولات محمد اورنگزیب پارینے کہ فچ انا رپورٹ و اسٹیٹ بینک انا کنڈآن پالیسی ریٹ اٹی کمتی آن زرگزران اٹی گچینی نا عکاسی مننگ اٹی ءِ، سوگوی آن نمونا کنڈآن ہِننگ اُن، ملکی زرگزران اٹی نجی بشخ انا کڑد اہمیت تخک، خوانہ کہ نجی بشخ زرگزرانی فرنٹ آ اہم کڑد ادا کے۔ پنچ شنبے نادے آ داڑے سیکورٹیز اینڈ ایکسچینج کمیشن نا پوسکن آ بلڈنگ نا بنائی دود آن تران کرسا وزیرخزانہ پارے کہ ساڑی آ دے تیٹی کریڈٹ ریٹنگ نا جہانی ایجنسی فچ انا رپورٹ و اسٹیٹ بینک انا کنڈآن پالیسی ریٹ اٹی کمتی آن زرگزران اٹی گچینی نا عکاسی مننگ اٹی ءِ۔ وزیراعظم محمد شہباز شریف نا کماشی ٹی حکومت نا اقتصادی ٹیم زرگزران اٹ گچینی کن گام گیج آتا چرجوئی ءِ برجاتخک۔ زرگزران سوگو مسنے و داسہ نن سوگوی آن نمو نا کنڈآ ہِننگ اُن۔ جہانی مالیاتی فنڈ اتون سٹاف کہول انا معاہدہ مسنے۔ آئی ایم ایف نا ایگزیکٹیو بورڈ انا منظوری آن پد پاکستان آئی ایم ایف تون پوسکن آپروگرام نا بناءِ کننگ ءِ۔ داپروگرام نا رداٹ پنجرجاتی اصلاحات نا عمل ءِ مون آ دننگک۔ داپروگرام نا رداٹ ٹیکسیشن و توانائی نا بشخ اٹی اصلاحات اتنگ انگ ءِ۔ کشت وکشار، آئی ٹی و ایلو بشخ آتیٹی براہ راست پیشن نا زرکاری کن ہم گام گیج کننگ انگ ءِ۔ پنجرجاتی اصلاحات نا ایجنڈا ءِ نن موخر کننگ کپنہ۔ وزیرخزانہ پارے کہ ملکی زرگزران اٹ نجی بشخ انا کڑد بھاز اہمیت تخک۔ نن خوانہ کہ نجی بشخ زرگزرانی فرنٹ آ اہم کڑد ادا کے۔ حکومتی پالیسی فریم ورک اتون اوار اوار کمکاری نا چرجوئی ءِ ہم برجاتخک۔ وزیرخزانہ پارے کہ سیکورٹیز اینڈ ایکسچینج کمیشن نا کنڈآن 5 سال انا انشورنس پیکج ستاکڑزک۔ المی داہیت انا ءِ کہ غٹ انشورنس سیکٹر نجی بشخ انا رداٹ بریر۔ آخبت اٹ ہراوام تے ہلنگک تو بیرہ پروجیکٹ آتیکن ہلنگ المی ءِ۔ وزیرخزانہ پارے کہ پاکستان جہانی کیپیٹل مارکیٹ نا کنڈآ ہِننگ ءِ۔ داٹی سیکورٹیز اینڈ ایکسچینج کمیشن آف پاکستان نا کڑد بھاز اہمیت تخک۔ ننے ایکویٹی و ڈیٹ مارکیٹ ءِ منظم کروئی ءِ۔ کیپیٹل مارکیٹ اٹی گچینی نا چرجوئی برجاسلک۔ وزیرخزانہ پارے کہ مالی نسخان ءِ کم کننگ کن مالی نظم و ضبط المی ءِ۔ السی فائدہ غاتا رکھ و شفاف مالیاتی مارکیٹ نا جوڑ کننگ سیکورٹیز اینڈ ایکسچینج کمیشن نا زمواری ءِ ولے شفافیت نا عمل ءِ متوازن وڑاٹ مون آ دننگ المی ءِ تانکہ کاروبار زہمی مف۔ اوپارے کہ زرکارآتے معلومداری نا فراوانی و مالیاتی تنوع نا کمک اٹ ایس ای سی پی بایدے تینا کڑد ءِ اداکے۔ اوپارے کہ کمیشن ہندی کیپیٹل مارکیٹ ءِ جہانی آب انا رداٹ جوڑ کننگ نا بابت اہم کڑدا اداکرینے۔ اگہ ننے دا ملک ءِ مون آدروئی ءِ تو ننے انسانی نیام تمنگ ءِ کم کرسا کاروباراٹی آسانی اتوئی ءِ۔ وزیرخزانہ پارے کہ ملک اٹی کچ ساڑی ءِ۔ 3 سال مست واپڈا گرین بانڈ جری کریسس ہرانا جوان بھرم مون آ بسوسس۔ اومستی پارے کہ کانود سازی نا پڑآ حکومت کمیشن اتون پبی کمکاری ءِ برجاتخک۔ ایس ای سی پی نا چیئرمین عاکف سعید دود آن تران کرسا پارے کہ کمیشن نا رداٹ ورناتے روزگار ناوارخواہی فراوان کننگ انگ ءِ۔ دارداٹ زالبول آتے ہم بریبر وارخواہی تننگ انگ ءِ۔ اوپارے کہ کمیشن نا رداٹ ضابطہ غاتے پوسکن آ خواست آتا رداٹ جوڑ کننگ انگ ءِ و اودے جہانی آب انا رداٹ ہم گرنچ کننگ انگ ءِ۔
