اسلام آباد۔ 01 اگست (اے پی پی) مسلم لیگ (ن) نا قومی اسمبلی نا باسک آک پارینو کہ بدلی و این آراو نا ہیت کروک آک اسہ وار ولدا یوٹرن ہلسا سلوک ءُ، اوفتا قسمت نا فیصلہ ءِ ملک انا الس و عدالت آک کیرہ، بانی پی ٹی آئی وخت اس زنچک اٹی ہلیک تو وخت اس نت تیا تمک۔ پنچ شنبے نادے آ داڑے مسلم لیگ(ن) نا قومی اسمبلی نا باسک دانیال چوہدری وجیہہ قمر تون اوار پریس کانفرنس آں تران کرساپارے کہ داہموفک ءُ ہرافک مخلوق ءِ 9 مئی نا واقعہ غاتے کرفیر۔ داہموفک ءُ ہرافتا ویڈیو بیان ساڑی ءِ کہ اگہ کنے دزگیرکننگے تو جی ایچ کیو آ جلہو کبو، اوشہید و اوفتا خاہوت آتیا مسخرہ خلک۔ اوپارےکہ مسلم لیگ (ن) ملک ءِ لوڈشیڈنگ آن پاک کرے و دہشت گردی آن نجات ترفے، اوتینا دور ءِ حکومت اٹ ملک اکن ہچس کتو، اوپاکستانی ورناتادوٹی پٹرول بمب تس ، اوفتے پرغ و بٹ و خاخر خلنگ نا تربیت تس۔ دانیال چوہدری نا پاننگ ئس کہ بانی پی ٹی آئی تینا مکافات عمل آن گدرینگ انگ ءِ، اوپاکستانی ورناتے گمراہ کننگ آ معافی خوائے، نواز شریف مدام ملک ءِ دفاعی و اقتصادی وڑاٹ سوگو کرے۔ اوپارے کہ ملک ءِ پِرغنگ نا سازش کننگ و خاخر لگفوک آ ءِ این آراو تفنہ۔ اول بانی پی ٹی آئی 9 مئی واقعہ غاتا زمواری تے امناکے۔ جلاؤ ، گھیراؤ آئین و پارلیمنٹ نا وجود ءِ امنا کپروک آتون ہچ ءُ ہیت اس مفک۔ دابیرہ تینا جند اکن این آر او خواہک۔ اوپارے کہ او مچ آ دنیا ٹی پاکستان و پاکستانی الس ءِ کرپٹ نا وڑاٹ روشناس کرفنگ نا کوشست کرے، اووخت اس ہم پاکستان نا روشنا چہرہ ءِ جہانی برادری ءِ نشان تتو، پی ٹی آئی نا دورءِ حکومت اٹ ہر بشخ اٹ کرپشن مس، نا قسمت نا فیصلہ ءِ پاکستانی الس و عدالت آک کیرہ ملک ءِ اسہ وار ولدا تہاری تیان کشنہ و سلہہ بند فوج اتون اواری اٹ دہشت گردی آن پاک کینہ۔ وجیہہ قمر پارے کہ پی ٹی آئی اسہ کنڈآ عدلیہ و ایلو ادارہ غاتے زور اٹ اتنگ نا کوشست کننگ اٹی ءِ ایلو کنڈآ دا این آراوکن منت کننگ ءِ، سلہہ بند فوج تینے سیست آن جتا کرینے، بانی پی ٹی آئی اسہ وار ولدا فوج ءِ سیاست اٹ گِرینگ خواہک، ننے ہمووخت آ حکومت رسینگا ہراتم ملک خواتہ مننگ نا دنگ آ سلیسوسس۔ داسہ وخت اس کہ ملک اقتصادی وڑاٹ سوگو مننگ ءِ داولدا ملک ءِ نزور کننگ خواہک ۔
