کوئٹہ۔ 01 اگست (اے پی پی) بلوچستان نا علاقائی موسمیاتی ہند نوکاپ نا بابت خبڑدار کرے، جمعہ آن سے شنبے اسکان شنزہ ئی آ پِر تیان مشی آ علاقہ غاتیٹی لینڈ سلائیڈنگ و ہندی جل تیٹی نوکاپ بننگ کیک، علاقائی موسمیاتی ہند بلوچستان نا رداٹ پِر آن گمانی وڑاٹ زہمی مروک آ علاقہ غاتیٹی قلات ، خضدار، بارکھان، لسبیلہ، ژوب، لورالائی، سبی، ہرنائی ، زیارت، آواران، کوہلو، ڈیرہ بگٹی، جھل مگسی، نصیر آباد، موسیٰ خیل وجعفر آباد نا ضلع غاک اوار ءُ۔ ہند اناپاننگ ءِ کہ پنچ شنبے نادے آ صوبہ نا گیشتر ضلع غاتیٹی موسم باسن جمری مننگ نا گمان ءِ، ولے شیرانی ، موسیٰ خیل، بارکھان اٹی منہ ہند آتیا ہورہ وگروک اٹ پِر وخت اس کہ سبی، ڈیرہ بگٹی، خضدار، قلات و کیبی ٹی جزوی وڑاٹ جمری مننگ نا گمان ءِ۔ موسمیاتی ہند انا رداٹ جمعہ نادے آ بارکھان، موسیٰ خیل، کوئٹہ، لورالائی، قلعہ سیف اللہ، ہرنائی، زیارت، ژوب، دکی، کوہلو، ڈیرہ بگٹی، سبی ،جعفر آباد، نصیر آباد، خضدار، قلات و مستونگ اٹی ہورہ و گروک اٹ پِر وخت اس کہ ایلو ضلع غاتیٹی موسم باسن مننگ نا گمان ءِ۔
