لندن۔ 01 اگست (اے پی پی) چیئرمین سینیٹ سید یوسف رضاگیلانی لندن اٹی فارن، کامن ویلتھ اینڈ ڈویلپمنٹ آفس (ایف سی ڈی او) ٹی برطانیہ نا ممبر پارلیمنٹ و وزیر مملکت سویلی ایشیا ہمیش فالکنر تون اوڑدہی کرے۔ داوخت آ پاکستان نا ہائی کمشنر ڈاکٹر محمد فیصل ہم ساڑی ئس۔ سینیٹ سیکرٹریٹ آن جاری بیان نا رداٹ چیئرمین سینیٹ ہمیش فالکنرءِ بطور وزیر تقرری آ مبارکبادی تس۔ چیئرمین سینیٹ ہڑتوم آ ملک آتا فائدہ غاتے مون آدننگ کن اسہ سوگو شریداری نا اہمیت آ زور شاغا۔ اوہڑتوم آ ملک آتا نیام اٹ تعلقداری تے مون آدننگ اٹ پاکستانی پردیسی تا کڑد ءِ ہم تالان کرے۔ چیئرمین سینیٹ اومیت ظاہر کرے کہ پاکستان و برطانیہ نا نیام اٹ خڑکی تعلقداری سٹریٹجک پارٹنر شپ اٹی بدل مریک۔ سید یوسف رضاگیلانی برطانیہ تون اقتصادی، دفاعی وواپاری بشخ آتیٹی کمکاری ءِ ودفنگ کن پاکستان نا عزم انا درشانی ءِ کرے و سویلی ایشیاٹی دیرپاامن و سوگوی نا دوئی کننگ کن اقوام متحدہ نا سلامتی کونسل نا قرارداد و جہانی کانود نا رداٹ جموں وکشمیر نا جھیڑہ نا ایسری نا اہمیت آہم زور شاغا۔ چیئرمین سینیٹ غزہ نا سنگین انسانی حالیت آتیا گڑتی نا درشانیءِ کرسا دمدستی جنگ بندی و فلسطین نا جھیڑہ نا ایسری آ زور شاغا۔ برطانوی وزیر مملکت ہمیش فالکنرایف سی ڈی او نا دورہ غا چیئرمین سینیٹ نا منت واری ءِ ہرفسا واپار وزرکاری، موسمیاتی بدلی، تعلیم و راجی و اقتصادی شونداری تون اوار چندی بشخ آتیٹی کمکاری ءِ پین مون آ دننگ نا اہمیت ءِ تالان کرسا پاکستان وبرطانیہ نا شریداری ءِ مون آ دننگ کن حکومت پاکستان تون اواری اٹ کاریم کننگ نا تینا است خواہی نا درشانی ءِ کرے ، او2010 اٹی ملتان نا نوکاپ نا وخت آ تینا اڈکننگ ءِ ہم یات کرے۔
