اسلام آباد۔ 31 جولائی (اے پی پی) سول جج جوڈیشل مجسٹریٹ محمد عباس شاہ قومی خبررساں ادارہ اے پی پی ٹی کروڑ آ روپئی مالیت نا کرپشن کیس اٹی پندار مسہ دوبہ دار آتے مسہ دے ئی جونی ریمانڈ آ ایف آئی اے نا دوٹی تس۔ چارشنبے نادے آ بنجائی جاست وپاستی ادارہ (ایف آئی اے) نا اینٹی کرپشن سیل محمد غواث(پروجیکٹ ڈائریکٹر) ، مصور عمران (ڈپٹی ڈائریکٹر) و سعد مدثر (مسکوہی چیف کمپیوٹر انجینئر ) ءِ عدالت اٹ پیش کرے۔ داوخت آ ایف آئی اے نا جاست وپاستی آفیسر اسفند یار موقف اختیار کرے کہ اسلام آباد ہائیکورٹ دوبہ دارآتاضمانت نا درخواست ءِ دزگیری آن مست خارج کرے اوکان پد ہرمسٹ آ دوبہ دارآتے دزگیرکننگا، دوبہ دار آتیان ریکارڈ و زر آتا برآمدگی کن 14 دے ئی جونی ریمانڈ نا خواست منظور کننگے۔ سماعت اٹی ’’اے پی پی‘‘ نا لیگل ایڈوائزر سردار یعقوب مستوئی ایڈووکیٹ دلیل تس کہ غٹ دوبہ دارآتیا پروکیورمنٹ کمیٹی نا باسک آک ءُ و جعلی دستخط آتا کمک اٹ اے جی پی آر اٹی 60 چیک جمع کرفنگانے۔ سردار یعقوب مستوئی پارے کہ 124 ملین روپئی الس نا خراج آتا پیسہ غاک ئسر۔ سرکاری ادارہ ٹی جعل سازی نا کمک اٹ داڑیلی کننگانے، دوبہ دار آتیان سرکاری زر ءِ ریکور کننگ کن جونی ریمانڈ تننگے۔ دوبہ دار آتا وکیل آک جونی ریمانڈنا مخالفت ءِ کریر۔ دلیل آتا پورو مننگ آ عدالت ہرمسٹ آ دوبہ دار آتے مسہ دے ئی جونی ریمانڈآ ایف آئی اے نا دوٹی تس۔
