اسلام آباد۔ 31 جولائی (اے پی پی) وزیراعظم محمد شہباز شریف پارینے کہ ملک آن پولیو نا پورو چٹفنگ کن ریاست نا غٹ وسیلہ غاتے کاریم اٹ اتنگے، ہموعلاقہ غاک ہراڑے سییکورٹی نا چیلنج ارے ہموڑے ہر چناءِ پولیو ویکسین نا فراوانی ءِ پک کننگے۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم داخیال آتا درشانی ءِ انسداد پولیو قومی ٹیم اتون گپ وتران کرسا کرے۔ اوڑدہی ٹی وزیراعظم نا کوآرڈی نیٹر قومی جان جوڑی ڈاکٹر ملک مختار احمد بھرتھ ، وزیراعظم نا فوکل پرسن انسداد پولیو ڈاکٹر عائشہ رضافاروق، سیکرٹری قومی جان جوڑی ڈاکٹر ندیم محبوب و نیشنل کوآرڈی نیٹر انسداد پولیو محمد انوارالحق ئسک ساڑی ئسر۔ وزیراعظم پارے کہ فرنٹ لائن ورکرآتا لگن حکومت پاکستان نا عزم و پارٹنر آتا کمک اٹ پاکستان پولیو نا برخلاف اہم پیش رفت کرینے ، داہیت تشویشناک ءِ کہ پاکستان ہمو اِرا ملک آتیان اسٹ ءِہراڑے پولیو نا چیلنج ساڑی ءِ ۔ داوخت آ وزیراعظم ءِ انسداد پولیو نا بابت حکمت عملی آ حوال تس و اودے انسداد پولیو نا بابت اِرٹ، چار و شش تُو انا پلان نا بابت ہم معلومدار کننگا۔ وزیراعظم ءِ پاننگاکہ 2024 ء ٹی داتم اسکان مچ آملک آن رپورٹ مروک آپولیو کیس آتا کچ 9 مسنے۔ ستمبر، اکتوبر ودسمبر 2024 اٹی پولیو ویکسین نا ملک گیر مہم اڈتننگک، ہمو چناک ہراکہ پولیو ویکسین کُننگ آن محروم رہینگار اوفتا ڈیٹاءِ ڈیجیٹائز کننگانے تانکہ ڈیجیٹل ٹریکنگ نا کمک اٹ اوفتا ویکسی نیشن ءِ کننگ مرے۔
