دنیاٹی ہرسرسہب ملک امن، سوگوی، پالیسی تا چرجوئی و پدریسہ اصلاحات نا کمک اٹ شون ہلکنے، احسن اقبال

اسلام آباد۔ 31 جولائی (اے پی پی) بنجائی وزیر ڈٹ بندی شونداری واصلاحات و خصوصی گام گیج احسن اقبال پارینے کہ دنیا ٹی ہرسرسہب ملک امن ، سوگوی، پالیسی تا چرجوئی و پدریسہ اصلاحات ناکمک اٹ شون ہلکنے۔ داخیال آتا درشانی ءِ او چارشنبے نادے آ انسٹی ٹیوٹ آف ریجنل سٹڈیز نا سیمینار سی پیک۔ گمان و چیلنج آتیٹی خصوصی تران کرساکرے۔ اوپارےکہ سی پیک نا بابت پاک چین جوائنٹ کوآپریشن کمیٹی نا 13 آن 10 دیوان کنا کماشی ٹی مسر۔ تاریخ گواہ ءِ کہ 7 دہائی تیا تالان پاک چین سنگتی سوگو مرسا ہِننگ ءِ، ننا سنگتی سمندر آن کڑمب، شاد آن ہنین و داسال مئی ٹی کمیونیکیشن سٹیلائٹ نا لانچ اتون آسمان آن بڑز مسنے۔ اوپارے کہ 2013 ٹی پاکستان اٹی 16 آن 28 گھنٹہ لوڈشیڈنگ مسکہ۔ نن 2 جنگ آتیٹی تینا وسیلہ غاتا قربانی تسن کولڈ وار و 9/11ٹی۔ اوپارے کہ 30لکھ آن زیات باہوٹ پاکستان اٹ پترینگار ہرا دیکی نا جنگ آتا باہوٹ ئسر، ننا ملک اوغانستان اٹی نیٹو ءِ مفت شپمنٹ فراوان کرسا کرے ولے اسہ پیسہ اس ہم ہلتو، امریکہ میکسیکو نا باہوٹ آتے تینا سیم تیٹی پترینگ نا موکل تفک ولے پاکستان مہاجر آتیکن درگہ غاتے ملا۔ اوپارے کہ 2013 ٹی پاکستان اٹی ترند زرگزرانی تنکی ئس بجلی نا کاختی ئس خودکش دھماکہ مسکہ، پاکستان نا تینا زرکارآک ملک اٹی انوسٹمنٹ آن خلیسرہ۔ پاکستان توانائی پالیسی نا پڑو کرسا جہانی زرکارآتیان بجلی ودی کننگ نا ڈٹ خلنگ نا خواست کرے۔ اوپارے کہ نن 2013 ٹی حکومت اٹی بسن، سی پیک آ دستخط مس و اگست 2013 ٹی جے سی سی نا اولیکو دیوان مس، چین پاکستان اٹی درملکی انویسٹمنٹ کروک آ غٹ آن بھلا ملک جوڑ مس، 2015 ٹی صدر شی جن پنگ پاکستان نادورہ ءِ کرے و 42 بلین ڈالر نا زرکاری آ دستخط کرے۔ اوپارے کہ وال اسٹریٹ نا ہیڈلائن نا رداٹ پاکستان نا تصور دہشت گرد آتا رکھ پناہ گاہ آن بدل کرسا ارب آڈالر نا زرکاری مدعو کروک آ ملک جوڑ مس، 2013آن 2015 نا نیام اٹ 2.3 ملین ملازمت آتا وارخواہی ودی مس، چین آن صنعتی زرکاری ءِ اتنگ کن 9 اقتصادی زون جوڑ کننگا۔ اوپارے کہ 2017ٹی پرائس واٹر کوپر نا ریسرچ نا رداٹ پاکستان 2030 اکان دنیا نا ٹاپ 20 زرگزران تیٹی اوار مننگ کریکہ، کنا برخلاف بے بنداو مقدمہ جوڑ کننگا کہ ای نارووال اٹی اسپورٹس کمپلیکس نا تفنگ کن فنڈز فراوان کریٹ، شہزاد اکبر و فواد چوہدری اعتراف کریر کہ دا مقدمہ غاک بے بنداو ئسر، 1992ٹی نن لبرلائزیشن ، ڈی ریگولیشن ، نجکاری نا پالیسی درستی راستی کرفین۔ اوپارے کہ سرتاج عزیز کنے پارے کہ وزیرخزانہ من موہن سنگھ پاکستان اٹ بزنس ریفارمز ءِ بھارت اٹی نافذ کننگ نا ارادہ کرے۔ 90 نا دہائی سیاسی خلل نا گواچی مس۔ بھارت اصلاحات نافذ کرے و ننے آن مون آ ہنا۔ پالیسیک 10 سال آن مست ڈیلیور مفسہ۔ پی ٹی آئی نا دور ءِ حکومت اٹ سی پیک ڈٹ آتیا کاریم سلیس۔ اوپارے کہ گوادر اٹی 2017 ٹی ہندی مخلوق کن دیر و بجلی نا ڈٹ آتا بناءِ کرین، ننا حکومت اٹی اسلام آباد ناہر سیکٹراٹی چینی کاروباری ادارہ غاتا دفتر نظر بسکہ۔ شونداری ناسیاست پی ٹی آئی دور اٹ خار و پولرائزیشن نا سیاست اٹ بدل مس۔ پی ٹی آئی ایران آن 100 میگاواٹ پائپ لائن پروجیکٹ 4 سال اسکان موخرکرے، نن اودے 8 تُو اٹی جوڑ کرین۔ گوادر آن پنجگور اسکان نیشنل گریڈ 12 تُو اٹی پورو مس ہرادے پی ٹی آئی توریسس۔ اوپارے کہ گوادر پورٹ اٹی 4 سال آن مینٹیننس ڈریجنگ کننگتویسس گوادر نا کڑمبی آ منفی اثر تماکہ، 2022 اٹی نن 5 ارب اٹی مینٹیننس کرین و گوادر اسہ وار ولدا کڑمب آ سمندر نا بندرگاہ جوڑ مس۔ دنیا ٹی ہر سرسہب ملک امن، سوگوی، پالیسی تا چرجوئی و پدریسہ اصلاحات نا کمک اٹ شون ہلکنے۔