اسلام آباد۔ 31 جولائی (اے پی پی) اسپیکر قومی اسمبلی سردار ایاز صادق پارینے کہ چینی حکومت نا کمک اٹ بلوچستان اٹی ’شی پاور‘ ڈٹ انابنا ستاکڑزک۔ ڈٹ پاکستان وچین نا سوگو بنداوتیا جوڑ سنگتی نا اسہ پین زندہ ءُ مثال اسے۔ چارشنبے نادے آ داڑے چینی سفارت خانہ ٹی بلوچستان نا زالبول آتا جان جوڑی نا بابت اڈ ہلوک دود آن تران کرسا اوپارے کہ اسکول آتا مسن تیٹی 20 ہزار ہیلتھ کٹ آتا بشخنگ آن نئے بیرہ جان جوڑی تون گنڈوک امور تیان واقفیت ودک بلکن دا مسن تا پرورش اٹی ہم کمکار مریک۔ دراخ جوڑ و ت خوانندہ زالبول شونہال و شون ہلوک راج اسے نا بنداو ءُ۔ اوپارے کہ بطورا سپیکر ای مدام زالبول و چناتا حق و رکھ اکن گام گیج کرینٹ۔ زالبول آتے قومی دنگ اٹ اتنگ کن کانودسازی اٹ پارلیمانی ویمن کاکس، ایس ڈی جیز ٹاسک فورس، پارلیمانی کمیٹی جینڈر مینسٹریمنگ اس جوڑکے۔ پاکستان و چین مدام اسہ ایلو تون تفینو۔ چین نا پاکستان نا زرگزرانی و راجی شونداری و شونہالی ٹی اہم کڑد ادا کننگ اٹی ءِ۔ پاک چین اقتصادی راہداری ڈٹ ہڑتوم آ ملک آتا نیام اٹ اسٹریٹجک شریداری ٹی اہم مزل نا حیثیت تخک ۔ پاک چین اقتصادی راہداری ڈٹ اٹی ودکی ستاکڑزک۔ اسپیکر پارے کہ پاکستان داسنگتی ءِ لتاڑنگ نا ہرسازش ءِ بے سہب کننگ کن سنبرینگوک ءِ۔ پاکستان و چین مدام دنیا ٹی امن ءِ مون آ دننگ نا ہیت ءِ کرینو۔ بلوچستان کنا است آن بھاز خڑک ءِ۔ بلوچستان نا الس ءِ مون تروک ویل آتا ایسر مدام اولیت آتیٹی اوار مسنے۔ پاکستان نا شونداری بلوچستان نا شونداری تون گنڈوک ءِ۔ بلوچستان نا شونداری و شونہالی کن چین نا کمک ستاکڑزک۔ چینی سفیر جیانگ زائیڈونگ دود اٹی شمولیت آ اسپیکر قومی اسمبلی نا منت واری ءِ ہرفے۔
