اسلام آباد۔ 31 جولائی (اے پی پی) بنجائی وزیر ڈٹ بندی شونداری و اصلاحات پروفیسر احسن اقبال پارینے کہ موسمیاتی خطرہ غاتون مون تننگ کن اسہ مربوط ءُ لائحہ عمل اسے نا دمدستی گرج ءِ، ہلہلہ ئی حالیت آتا گچین ریسپانس ءِ پک کننگ کن این ڈی ایم اے نا کڑد اہم ءِ۔ داخیال آتا درشانی ءِ او چارشنبے نادے آوزیراعظم پاکستان نا پارت آ این ڈی ایم اے ٹی قومی کہول آ ڈیزاسٹر رسپانس کمیٹی نا دیوان آن تران کرسا کرے۔ وزیراعظم بشام اٹی ادارہ غاتا نیام اٹ گچین کمکاری کن ڈیزاسٹر رسپانس کمیٹی اس جوڑ کریسس، دیوان نا کماشیءِ بنجائی وزیر ڈٹ بندی، شونداری و خصوصی گام گیج احسن اقبال کرے۔ بنجائی وزیر پروفیسر احسن اقبال نا کماشی ٹی دیوان اٹی ممکنہ ہلہلہ ئی حالیت آتون مون تننگ کن فعال ردعمل نا ڈٹ آتیکن لائحہ عمل اسے آ گپ وتران کرے۔ اوادارہ غاتا نیام اٹ رابطہ کاری ءِ گچین کننگ، اسیجائی ہیلکاری مشق آتا اڈتننگ ومربوط ردعمل ءِ پک کننگ نا عزم انا درشانی ءِ کرے و صوبائی ادارہ غاتے ناگہانی حالیت آتون مون تننگ کن پیشگی گام گیج آتے پک کننگ نا پارت کرے۔ اوپارے کہ موسمیاتی خطرہ غاتون مون تننگ کن اسہ مربوط لائحہ عمل اسے نا دمدستی گرج ءِ۔ ہلہلہ ئی حالیت آتا گچین ریسپانس ءِ پک کننگ کن این ڈی ایم اے نا کڑد اہم ءِ، ڈی آرسی نا ٹہیفنگ پاکستان نا ڈیزاسٹر مینجمنٹ فریم ورک ءِ سوگو کننگ و بنجائی و صوبائی حکومت آتا نیام اٹ ہم گرنچی ءِ ودفنگ کن اہم ءُ گام اسے۔ احسن اقبال پارے کہ صوبائی ادارہ غاک بشام نا پِر تارداٹ دُوشہ نا کُننگ نا ویکسی نیشن تون اوار ایلو گرج آتا وخت آ بست وبند ءِ کیر، کمیٹی نا مسخت آتا دوئی کننگ ءِ پک کننگ کن غٹ تعلقدار اسٹیک ہولڈر آتے بھاز زمواری اتون تینا کڑد ءِ ادا کروئی مریک، دیوان نا ایسر آ احسن اقبال موبائل ڈیزاسٹر ایمرجنسی آپریشن سینٹر نا دورہ ءِ کرے۔
