سر وزیر سندھ ءَ گوں بنجاھی وزیر رانا تنویر ءِ گوما گند ءُ نند کت،اسٹیل ملز ءِ گیشیں زمین آنی سر ءَ اسپیشل اکنامک زون جوڑ کنگ ءِ بابت ءَ ھیال ریچی

کراچی۔ 30 جولائی (اے پی پی): سر وزیر سندھ سید مراد علی شاہ ءَ گوں بنجاھی وزیر برائے صنعت ءُ پیداوار رانا تنویر ءَ گند ءُ نند کت۔گند ءُ نند ءَ پاکستان اسٹیل ملز ءِگیشیں زمین آنی سر ءَ اسپیشل اکنامکی زون جوڑ کنگ ءِ ھوالگ ءَ ھیال ریچی کنگ بوت۔ سر وزیر گس ءَ جاڑیگیں جار آنی رد ءَ گند ءُ نند ءَ سر وزیر سندھ ءِ گوما وزیر ءِ صنعت جام اکرام اللہ دھاریجو، چیف سیکرٹری آصف حیدر شاہ،پرنسپل سیکرٹری آغا واصف ، سیکرٹری صنعت یاسین شر ءُ ایندگر وھدیکہ بنجاھی وزیر ءِ گوما بنجاھی سیکرٹری سیف انجم ءُ ایندگر ساڑی اتنت۔ سر وزیر سندھ ءَ گوشت کہ سندھ کابینہ ءَ پیسلہ کتگ کہ 700 ایکڑ زمین اسٹیل ملز پلانٹ ءِواستہ گیشینگ بہ بیت، 700 ایکڑز زمین کوھنیں پلانٹ برجا کنگ بہ بیت، یا نوکیں پلانٹ جنگ بہ بیت، کابینہ ءَ اے ھم پیسلہ کت کہ 4840 ایکڑ ءِسر ءَ اسپیشل اکنامکی زون جوڑ کنگ بہ بیت، سر وزیر سندھ ءَگوشتگ کہ اسپیشل اکنامک زون سندھ ءُ بنجاھی حکومت آنی یکجائی منصوبگ ات،دوئیں حکومت وت مہ وتی یکجائی ءَ بہ نند انت ءُ جیڈھ آناں گیوار بہ کن اَنت۔ بنجاھی وزیر رانا تنویر ءَ گوشت کہ سپیشل اکنامک زون ءَ را انویسٹر دیمروئی دیگ لوٹ انت۔ بنجاھی حکومت لوٹ ائیت کہ سندھ ءُ بنجاھی حکومت وتی پیپر ورک سرجم بکن انت تانکہ انویسٹر کار بندات بہ بیت۔ سر وزیر سندھ ءَ گوشت کہ اسپیشل اکنامک زون ءِ زمین باز ارزشتی انت ، زمین ءِ سرجمیں انفراسٹکچر جوڑ بوتگ ءُ آپ ءُ گیس ءِ آسراتی است انت۔ بنجاھی وزیر ءَ گوشتگ کہ 700 ایکڑز پلانٹ والا ایں زمین سندھ حکومت ءِ ھوالگ ءَ کنگ لوٹاں،سندھ حکومت اسٹیل ملز برجا بہ کنت تا نوکیں پلانٹ ءِ بجنت۔ جار ءَ گیش گوشگ بوت کہ سر وزیر سندھ ءُ بنجاھی وزیر ءَ وتی وتی شور ءُ مشور لستیں روچاں سرجم کنان ءَ اکنامک زون ءِ مسلی کاروائی سرجم کنت انت۔