اسلام آباد۔ 30 جولائی (اے پی پی) بنجائی وزیر واپار جام کمال خان پارینے کہ برانز نا آڑ اٹ چاگڑد ءِ بایدے خراب کننگپ، ہربندغ تیناآئینی دنگ اٹ رہینگسا تینا برانز ءِ بایدے ریکارڈ کرفے، بے سوب برانزنا سوب آن ملک انا دروشم پیشن نا دنیا ٹی خراب مریک و پیشن نا زرکارآک ہچکچاہٹ نا گواچی مریرہ۔ داخیال آتا درشانی ءِ او سے شنبے نادے آ تینا جاری کروک ویڈیو بیان اٹی کرے۔ بنجائی وزیر پارے کہ ویل مچ آ دنیا ٹی ہرجاگہ غا مریک ولے اوفتا ایسر اس کشنگک، مچ آ دنیا ٹی برانز مریک ولے پاکستان خاص کر بلوچستان و ایلو جاگہ غاتیا ساڑی آ دے تیٹی مروک آ واقعہ غاک مذمت نا قابل ءُ۔ وزیرواپار پارے کہ پاکستان اٹ برانز تو کننگک ولے دا برانز نا مسخت پیدوار مفک و ویل آتیا ہیت کننگپک۔ اوپارےکہ حکومت چاہک کہ ملک اٹی بھاز انگا ویل آک ءُ ہرافتے ٹی سرفہرست بجلی نا نہاد آتا ویل ءِ و حکومت داویل ءِ ایسر کننگ کن کاریم کننگ اٹی ءِ ہراڑآ زرس وخت درکارءِ، توانائی نا بابت غٹ ویل آتے ایسر کننگ کن وزیراعظم ذاتی است خواہی ہلنگ اٹی ءِ ۔ بنجائی وزیرپارے کہ حکومت تاریخ اٹ اولیکو وار گونڈ مد اٹی کشاری گڑاتا برآمد آتیان 8 ارب ڈالر زرمبادلہ دوئی کرینے و بھاز انگا بشخ آتیٹی گچینی بننگ ءِ۔ اوپارےکہ کبینی نا کچ اٹی پدریسہ کمتی واقع مننگ اٹی ءِ و واپاری نسخان اٹی ہم نمان کمتی مون آ بسنے۔ بلوچستان نابابت بنجائی وزیرپارے کہ ای تینٹ بلوچستان نا وزیراعلیٰ رہینگانٹ و ہموجاگہ نا ویل آتیان معلومدار اُٹ۔ اوپارے کہ بلوچستان نا سیم اِرا ملک آتون ملک واونا ویل آتے گوجالنگ مفک۔ اوپارے کہ دااسہ سوج اسے کہ پاکسان اینو داحالیت آتسکان امر رسینگانے ولے داویل آ غٹ ءِ اواری اٹ گپ وتران کروئی مریک و داباندات آ ڈیبیٹ مننگ کیک۔ اوپارے کہ وخت اتون اوار اوارغٹ ویل آتے ایسر کننگ انگ ءِ و دامسخت کن بنجائی و صوبائی حکومت آک اواری اٹ کاریم کننگ اٹی ءُ۔ جام کمال پارے کہ تنقید کننگ الس نا حق ءِ ولے الس کس اسے نا پروپیگنڈاٹی بایدے بف۔
