وزیراعظم نا کماشی ٹی جان جوڑی نا بشخ انا گچینی کن پبی گام گیج برجاءِ، مون انگا زڑدوئی نا چٹفنگ نا پروگرام نا بناءِ کرینن، ڈاکٹر مختار احمد بھرتھ

اسلام آباد۔ 30 جولائی (اے پی پی) وزیراعظم نا کوآرڈی نیٹر جان جوڑی ڈاکٹر مختار احمد بھرتھ پارینے کہ وزیراعظم نا کماشی ٹی جان جوڑی نا بشخ انا گچینی کن پبی  گام گیج برجاءِ، بنجاوصوبہ غاک مون انگا زڑدوئی نا چٹفنگ کن 68 ارب نا بھلو خڑچ اسے آن پروگرام نا بناءِ کرینو، ڈبلیو ایچ او نا جان جوڑی نا بشخ اٹی برجا خذمت آتے قدر انا نظر اٹ ہرک۔ وزارت جان جوڑی آن جاری بیان نا رداٹ داخیال آتا درشانی ءِ او ڈائریکٹر جہانی ادارہ جان جوڑی نا کماشی ٹی بڑزکو کہولی ڈل اتون گپ وتران کرساکرے ہرا سے شنبے نادے آ داڑے اوڑتون اوڑدہی کرے۔ داوخت آ بنجائی سیکرٹری ہیلتھ ندیم محبوب ہم ساڑی ئس۔ اوڑدہی ٹی جان جوڑی نا بشخ و تین پہ تینی است خواہی نا امور آ گپ وتران کننگا۔ داوخت آ ڈاکٹر مختاراحمد بھرتھ پارے کہ ڈبلیو ایچ او نا جان جوڑی نا بشخ اٹی برجاخذمت آتے قدر انا نظر اٹ ہرنہ۔ وزیراعظم نا کماشی ٹی جان جوڑی نا بشخ اناگچینی کن پبی گام گیج برجاءِ۔ اوپارے کہ مون انگا زڑدوئی نا چٹفنگ کن بنجاو صوبہ غاک 68ارب نا بھلو زراسے آن پروگرام نا بناءِ کرینو۔ اوپارے کہ وزیراعظم نا پروگرام  مون انگا زڑدوئی نا چٹفنگ آ بنجائی و صوبائی حکومت آک عملدرآمد کیرہ۔ مچ آملک اٹی بھلو کچ اسے آ160ملین آبادی نا سکریننگ ءِ پک کینہ۔ ٹیسٹ مثبت بننگ آ ناجوڑ آتے مفت درمان فراوان کننگک۔ اوپارے کہ زڑدوئی نا بھاز زیات بھاریم مننگ نا سوب آن وزارت جان جوڑی زڑدوئی نا چٹفنگ ءِ پک کننگ کن مربوط حکمت عملی اس جوڑ کرینے۔ مون انگا زڑدوئی نا نتیجہ ٹی مروک آپیچیدگی تیان مرک آک ودرہ و اونا درمان ہم کبین ءِ۔ ڈاکٹر مختار احمد پارے کہ وخت انا خواست ءِ ، بنجائی و صوبہ غاک اواری اٹ زڑدوئی نا چٹفنگ ءِ پک کیر۔ وزارت دترنا سکریننگ ءِ ودفنگ ٹیسٹنگ و درمان، دترنا رکھ منتقلی ءِ پک کیک۔ بے کاریم اٹ اتوک آ و ڈسپوزل سرنچ آتا کاریم اٹ اتنگ و انفیکشن کنٹرول آ عملدرآمد ءِ پک کیک۔ اوڑدہی ٹی ڈائریکٹر جہانی ادارہ جان جوڑی کوآرڈی نیٹر ڈاکٹر ملک مختار احمد ءِ زڑدوئی نا چٹفنگ کن ہرممکن کمکاری نا باوری کرفے۔ جہانی ادارہ جان جوڑی نا ڈل زڑدوئی نا توننگ کن حکومتی گام گیج آتا ہم ستاءِ کرے۔