اسپیکر قومی اسمبلی تون دولت مشترکہ نا سیکرٹری جنرل نا اوڑدہی ، تین پہ تینی است خواہی نا امور آ گپ وتران

اسلام آباد۔ 30 جولائی (اے پی پی) اسپیکر قومی اسمبلی سردار ایاز صادق تون دولت مشترکہ نا سیکرٹری جنرل پیٹریشیا اسکاٹ لینڈ اوڑدہی کرے ہراٹی دولت مشترکہ نا باسک ملک آتا نیام اٹ کمکاری ءِ مون آ دننگ تون اوار تین پہ تینی است خواہی نا ایلو اہم امور تیا گپ وتران کننگا۔ اسپیکر قومی اسمبلی پارے کہ دولت مشترکہ جہانی شریداری ءِ مون آ دننگ نا اہم فورم ءِ۔ باسک ملک آتیٹی پارلیمانی، اقتصادی و راجی بشخ آتیٹی کمکاری نا بھلو وارخواہی اس ساڑی ءِ۔ پارلیمنٹ ءِ پین فعال کننگ کن بطور اسپیکر بھاز انگا گام گیج کرے۔ کانود سازی ٹی اسپورٹ کن لیجسلیٹوڈرافٹنگ کونسل اس جوڑ کے۔ اسپیکر پارے  کہ پارلیمانی فرینڈ شپ گروپ، ایس ڈی جیز ٹاسک فورس، چناتیکن انرن شپ پروگرام دا گام گیج آتا بشخ ءُ۔ اوڑدہی ٹی مصنوعی ذہانت(اے آئی) خاص کر کانود سازی نا بشخ آتیٹی اونا کاریم اٹ اتنگ نا بابت ہم گپ وتران کننگا۔ اسپیکر دولت مشترکہ نا کانود سازی نا بشخ اٹی مصنوعی ذہانت نا کاریم اٹ اتنگ نا بابت گام گیج خاص کر دولت مشترکہ ناآرٹیفیشل انٹیلی جنس اکیڈمی ٹی است خواہی نا درشانی ءِ کرے۔ اوپارےکہ سیکرٹری جنرل دولت مشترکہ پیٹریشیااسکاٹ لینڈ نا دولت مشترکہ ٹی اوار ملک آتیٹی کمکاری نا مون آ دننگ کن کوشست ستاکڑزک۔ دولت مشترکہ نا سیکرٹری جنرل جم وجوش اٹ بخیر و مہمانداری آ اسپیکر قومی اسمبلی نا منت واریءِ ہرفسا پارے کہ پاکستان دولت مشترکہ ءِ مدام اہمیت تس۔ جہانی ویل آتا ایسری کن دولت مشترکہ نا باسک ملک آتا نیام اٹ خڑکی کمکاری وخت انا گرج ءِ۔ اوڑدہی ٹی قومی اسمبلی ٹی ساڑی پارلیمانی فورم تا سروک، اسمبلی نا باسک و پرائم منسٹر یوتھ پروگرام نا سروک  ہم بشخ ہلک۔