اسلام آباد ہائیکورٹ آن اے پی پی کرپشن کیس اٹی پندار دوبہ دارآتا دزگیری آن مست ضمانت نا درخواست خارج، ایف آئی اے مسہ دوبہ دار آتے دزگیرکرے

اسلام آباد۔ 30 جولائی (اے پی پی) اسلام آبادہائیکورٹ قومی خبررساں ادارہ ’’اے پی پی‘‘ ٹی کروڑآ روپئی مالیت نا کرپشن کیس اٹی پندار دوبہ دار آتا دزگیری آن مست ضمانت نا درخواست آتے خارج کرےو بنجائی جاست وپاستی ادارہ (ایف آئی اے ) مسہ دوبہ دار، ہمووخت انا پروجیکٹ ڈائریکٹر محمد غواث خان، مصور عمران (ڈپٹی ڈائریکٹر) و سعد مدثر(مسکوہی چیف کمپیوٹر انجینئر) ءِ دزگیرکرے۔ سے شنبے نادے آ عدالت عالیہ نا جسٹس طارق محمود جہانگیری دوبہ دارآتاکنڈآن دائر درخواست دزگیر آن مست ضمانت نا سماعت کرے۔ داوخت آ اے پی پی نا لیگل ایڈوائزر سینئر کانود دان سردار یعقوب مستوئی ایڈووکیٹ عدالت اٹ پیش مس وخت اس کہ ایف آئی اے نا کنڈآن اسسٹنٹ ڈائریکٹر شاہد پرویز ملک پیش مس۔ سردار یعقوب مستوئی ایڈووکیٹ موقف اختیارکرے کہ ماتحت عدالت دوبہ دارآتا ضمانت آتے منسوخ کریسس ولے دوبہ دارآک نراسر، دوبہ دارآک کرپشن نا کمک اٹ قومی خبررساں ادارہ ءِ کروڑآتا نسخان تسنو ہنداسوب آن دوبہ دارآتا درخواست ضمانت ءِ منسوخ کننگے۔ عدالت دوبہ دارآتا درخواست ضمانت ءِ خارج کننگ نا پرمان جاری کرے۔ ایف آئی اے ضمانت منسوخی آن پد دوبہ دار غواث خان ، سعد مدثر و مصور عمران ءِ دزگیرکرے۔ یات سلے کہ ایف آئی اے ہرمسٹ آ دوبہ دار آتون اوار بلال ظفر (ڈپٹی ڈائریکٹر سائبر ونگ وزارت حوالکاری)، ارشد مجید چوہدری (مسکوہی منیجر اکاؤنٹس) ،ضیا ءاللہ بھٹو(ہمووخت انا ڈائریکٹر ایڈمن اینڈ پی اینڈڈی) ، میسرز تیجاری پاکستان پرائیویٹ لمیٹڈ، میسرز نیوہورائیزن، میسرز آرٹیک سسٹم،میسرز میڈیا لنکس نا عہدیدارآک اوار ءُ، نا برخلاف سیکشن 34.409 ،  ‏420، 468، 471 ، PPC r/w 5(2) 47 PCAنا رداٹ مقدمہ نوشتہ کریسس۔ داکان بیدس ترجمان ایف آئی اے نا جاری کروک بیان نا رداٹ اینٹی کرپشن سرکل اسلام آباد کارروائی کرسا کرپشن، وڈی خوری، فراڈ، مجرمانہ غفلت و واکداری تا ناروا کاریم اٹ اتنگ اٹی اوار 3 سرکاری کارندہ محمد غواث، سعد مدثر ومصور عمران ءِ دزگیرکرے۔ بنائی جاست وپاست نا رداٹ دوبہ دارآک کرپشن کرسا قومی خزانہ ءِ 124 ملین روپئی نا نسخان تسر۔ ترجمان نا رداٹ دوبہ دارآک ایسوسی ایٹڈ پریس کارپوریشن آف پاکستان نا پروکیورمنٹ کمیٹی نا بشخ ئسر، دوبہ دارآک اسہ ایلو تون ملنگ، درو واکداری تیان گدرینگسا آرٹیک سسٹم پنی ءُ فرم اسے 113 ملین ناکنٹریکٹ تسر، ہندا فرم انا فنانشنل پروپوزل مجاز اتھارٹی آن منظور اَلوکہ، دوبہ دارآک اے جی پی آر آن بل منظور کرفنگ نا پروکیورمنٹ کمیٹی ناتینٹ جعلی میٹنگ منٹس جوڑ کریر۔ داڈٹ انا جم خڑچ 786.79 ملین روپئی ئسر۔ سماعت اٹی دوبہ دار آتا وکیل آک عدالت نا روبرو تینا دلیل آتیٹی درخواست گزار آتا ضمانت آتے منظور کننگ نادرخواست کریر  وخت اس کہ اے پی پی نا لیگل ایڈوائزر سردار محمدیعقوب مستوئی دلیل ترساپارے کہ دوبہ دار آک پیپر ارولز انا خلاف ورزی ءِ کرسا قومی ادارہ ءِ کروڑآروپئی نا نسخان تسنو، داریکارڈ نا ہیت اسے کہ ہر درخواست گزار آ مخصوص کڑد انا دوبہ خلنگانے ، ہنداسوب آن دوبہ دار آتا ضمانت آتا درخواست آتے مستر د کننگے۔ داڑے داہیت ذکر انا قابل ءِ کہ ایف آئی اے نا اینٹی کرپشن سرکل اسلام آباد نا ڈپٹی ڈائریکٹر محمد افضل نیازی نا کماشی ٹی ایف آئی اے ٹیم دا وڈی خوری کیس اٹ میرٹ و شفافیت نا کمک اٹ پبی شاہدی جمع کرے و بے کچ جانفشانی و تندہی اٹ انکوائری پورو کرے۔ ترجمان ایف آئی اے نا رداٹ دوبہ دارآتے دزگیرکرسا جاست وپاست نا بناءِ کننگانے۔