اسلام آباد۔ 30 جولائی (اے پی پی) بنجائی وزیر داخلہ محسن نقوی انسانی اسمگلنگ نا توننگ نا جہانی دے آ تینا خصوصی کلہو اٹی پارینے کہ بے روزگاری ، نیزگاری و وسیلہ غاتے غیر منصفانہ بشخنگ آن انسانی اسمگلنگ اٹی ودکی مسنے۔ پدتموک ملک آتے غیرکانودی انسانی اسمگلنگ نا غت آن زیات مون تروک ءِ ، پاکستان اٹی ہم انسانی اسمگلنگ نا منظم گینگ سرگرم ءِ۔ دارداٹ ایف آئی اے دا گینگ آتا پدرند ءِ خلنگ کن ہروخت تیار ءِ و چندی دوبہ دار آتے کانود نا گرفت اٹ اتنگانے۔ انسانی اسمگلنگ نا توننگ کن اقوام عالم ءِ کثیر الجہتی اسیجائی گام گیج کننگ نا سخت گرج ءِ۔ بنجائی وزیر داخلہ پارے کہ انسانی اسمگلر آک لالچ اٹی ہزار آ مخلوق نا زند آتون گوازی کیرہ و انسانی اسمگلر آتا دوتے اٹ چندی خاہوت آک تینا دوست آتیان جتا مسنو۔ محسن نقوی داہیت آ زور شاغا کہ شون ہلوک و پدتمو ک ملک آتے اینو دا گندہ انگا ڈہ انا برخلاف یکجا بش مروئی مریک۔ انسانی اسمگلنگ انسانی حق، وقار و آجوئی نا اسُل خلاف ورزی ءِ۔ ببو اواری اٹ انسانی اسمگلنگ نا برخلاف آگاہی ودی کین و انسانی اسمگلنگ نا سوب آتے تورن و اسہ ہندن ءُ راج اسے کن کاریم کین ہراڑے انسانی اسمگلنگ نا حالیت آتیٹی کس اسے نا استحصال مف۔
