نیویارک۔ 30 جولائی (اے پی پی) امریکہ ٹی پاکستان نا سفیر مسعود خان پارینے کہ پاکستان ءِ اومیت ءِ کہ امریکہ ٹی نومبر اٹی مروک آ گچین کاری تیٹی ہرکس کہ صدر گچین مریک او سویلی ایشیاٹی امن و سوگوی آ چکار تخک و بھارت وپاکستان نا نیام اٹ دہائی تیامتکن کشمیر نا جھیڑہ ءِ ایسر کننگ اٹ کمک کیک۔ مسعود خان نیوزویک اٹی شینک مروک آ تینا سرحال اٹی پارے کہ امریکہ نا الس صدارتی گچین کاری تیٹی ہراکہ اومیتدار ءِ گچین کیرہ ، ننے اوڑتون کاریم کروئی ءِ۔ صدارتی اومیتدار کملاہیرس تینا گچین کاری مہم اٹی پارے کہ ننے کشمیری تے یات ترفوئی ءِ کہ او دنیا ٹی تنیا افس، نن حالیت آتیا نظر تخانن۔ اگہ حالیت آتا خواست مریک تو نیام تمنگ نا گرج ءِ۔ مسعود خان پارے کہ ننے 2019 اٹی کشمیر نا بارواٹی تروک آ گڑاس بیان تیان باورکرفنگاسس و ای ہمووخت انا نائب صدر کملا ہیرس نا بیان تے ہم اوار کیوہ کہ کشمیری تا حق انا مخ تفی نا بنداو ساڑی ءِ۔ ہندا سوب آن نن اومیت کینہ کہ امریکہ ٹی ہراکہ انتظامیہ مریک او کہی سوب آتا بناآ سویلی ایشیاٹی امن و سوگوی آ چکار تخک انتئے کہ ای تکیوہ کہ دنیا نا آخبت سویلی ایشیاٹی سوگوی آ منحصر ءِ۔ دا چرجوئی ٹی مسعود خان امریکہ غان خواست کرے کہ او کشمیرنا جھیڑہ تون اوار ایلو جھیڑہ غاتا ایسر، ایلو ملک آتیکن مذاکرات نا چرجوئی ٹی ثالثی نا بابت دانشمندی نا درشانی ءِ کے۔ اوغانستان نا بارواٹی نیوزویک ہمسایہ ملک اوغانستان اٹی برجابدامنی و پاکستان آ اونا اثرآتا حوالہ ءِ تس۔ مسعود خان پارے کہ اینو داعش نا اوغانستان اٹی قائم داعش خراسان شاخ ہرا ڈیہہ اٹی سرگرم کیہی شورش آتیٹی غٹ آن زیات خطرناک و زیات گیشتر دنگ اس تخوک آءِ، دہشت گردی نا برخلاف پوسکن ءُ جنگ اسے ودی کرینے۔ اودلیل تس کہ تحریک طالبان پاکستان (ٹی ٹی پی ) کون آ ایلو گروہ ہم ڈیہہ اٹی بھسکاری کننگ ءُ ہراڑآ چکار کننگ نا گرج ءِ۔ مسعود خان پارے کہ ہنداوڑ یوکرین جھیڑہ، ولدا 7 اکتوبر و اوکان پد دے ٹک نیامی ٹی بھسکاری نا حالیت مون تروک ءِ۔ مسعود خان پارے کہ امریکہ ڈغار آ غٹ آن واکدار ملک و دنیا نا غٹ آن بھلا زرگزران ءِ و چین اسہ اہم ءُ ملک اسے ہرا زرگزرانی وڑاٹ زبردست رفتار اٹ شون ہلنگ ءِ و اونا دنیا ٹی اثرورسوخ ءِ و ہڑتوم آ تون ننا بھاز اہم تعلقداری ءِ۔ پاکستانی سفیر پارے کہ امریکہ یا چین ننتون براہ راست ہڑتوم آملک آتیان اسٹ اسے گچین کننگ کن پاتنو ، ہنداسوب آن ای پاوہ کہ دا اسہ جوان ءُ ماڈل اسے۔
