کوئٹہ۔ 30 جولائی (اے پی پی) ڈپٹی کمشنر جھل مگسی سید رحمت اللہ شاہ نا پارت آتے مون آتخسا علاقہ ٹی امن وایمنی نا حالیت آتے گچین کننگ کن مچ آ ضلع نا اہم شاہراہ تیا لیویز فورس انا کارندہ سنیپ چیکنگ اٹی لگوک ءُ۔ڈپٹی کمشنر جھل مگسی سید رحمت اللہ شاہ پارینے کہ غٹ لیویز فورس انا آفیسر و کارندہ غاک امن وایمنی نا بحالی کن ہروخت چاک و چوبند الرٹ سلسا تینا غٹ تر توانائی تے خڑچ کیر تینا تینا تعلقدار تھانہ جات وچیک پوسٹ آتا سفائی و ستھرائی اتون تینا حاضری ءِ ہم پک کیر فرض منصبی نا ادائیگی ٹی ڈیوالئی و لاپرواہی و غیرحاضر کارندہ غاتا برخلاف سخت آن سخت کارروائی کننگک۔ اوپارے کہ ہراعلاقہ ٹی دُزی و داڑیلی نا واردات مس تو اونا غٹ تر زمواری تعلقدار ایریا نا لیویز ورس انا ایس ایچ او و کارندہ غاتیا مریک۔ ضلع نا الس نا جان ومال انا رکھ آ ہچ ءُ سمجھوتہ اس کننگپک غٹ لیویز فورس انا آفیسر وکارندہ غاتیا بھلو زمواری اس بیٹ مریک کہ اوتینا فرض ءِ منصبی ءِ جوان اٹ سرترسا تینا تینا تعلقدار علاقہ ٹی امن وایمنی نا حالیت آتے گچین کیر و سُوالی تا ویل آتے اولیتی بنداوتیا دمدستی وڑاٹ ایسر کننگ کن دے و نن کوشست کیر۔ غٹ شاہراہ خاص وڑاٹ نوتال ٹو گنداوہ شاہراہ غا موبائل گشت، موٹرسائیکل پیٹرولنگ و سنیپ چیکنگ ءِ برجاتخر کسبی ڈوہدار زموار و اشتہاری دوبہ دار آتیا سخت نظر تخسا اوفتا برخلاف باضابطہ وڑاٹ کانود نا رداٹ کارروائی کننگے تانکہ ضلع نا امن و ایمنی نا حالیت آتے گچین کننگ مرے۔
