پاکستان دولت مشترکہ تون رابطہ، تعلیم و کلائمیٹ ریزیلینس نا ایجنڈا ءِ مون آ دننگ کن سنبرینگوک ءِ، محمد اسحاق ڈار

اسلام آباد۔ 29 جولائی (اے پی پی) نائب وزیراعظم و وزیرخارجہ سینیٹر محمد اسحاق ڈار داہیت انا درشانی ءِ کرینے کہ پاکستان دولت مشترکہ تون رابطہ ، تعلیم ، ورناو زالبول آتے واکدار کننگ وکلائمیٹ ریزیلینس ناایجنڈا ءِ مون آ دننگ کن سنبرینگوک ءِ، نائب وزیراعظم داخیال آتا درشانی ءِ  دوشنبے نادے  آ داڑے دولت مشترکہ نا سیکرٹری جنرل پیٹریشیا سکاٹ لینڈ تون اوڑدہی آن پد اسیجائی پریس کانفرنس آن تران کرساکرے۔ اوپارے کہ پاکستان 21 می صدی نا چیلنج آتون مون تننگ کن دولت مشترکہ ءِ سوگو و پوسکن جوڑ کننگ نا گام گیج آتا مخ تفی کن سنبرینگوک سلنگ تون اوار اوار باسک ملک آتا نیام اٹ فعال کڑد ادا کرساکیک۔ اوسیکرٹری جنرل  نا تنظیم نا قدر و مشن ءِ مون آ دننگ و نقطہ نظر ءِ پوسکن کننگ اٹ اونا کڑد انا ستاءِ کرے۔ نائب وزیراعظم نوکاپ آن پد پاکستان نا کمک ءِ کننگ آن بیدس تعلیم، ورناتے واکدار کننگ، صلاحیت سازی و کلائمیٹ ریزیلینس اٹ کمکاری  ءِ مون آ دننگ اٹ اوفتا کڑد انا ستاءِ کرے۔ اودولت مشترکہ نا کڑد آزور شاغسا پارے کہ او باسک ملک آتا نیام اٹ متکن آ جھیڑہ غاتے سرعت اتون ایسر کے و اقوام متحدہ نا سلامتی کونسل نا قرارداد آتیا عملدرآمد کن زور شاغے۔ نائب وزیراعظم پارے کہ علاقائی رابطہ غاتا ایجنڈانا بارواٹی پاکستان نا وژن دولت مشترکہ تون مماثلت تخک۔ اوتعلیم، کسب ، ورناو زالبول آتے واکدار کننگ، جان جوڑی و چاگڑد نا رکھ اٹی ہدف آتے دوئی کننگ اٹ کمکاری نا گیشتر وارخواہی تا ہم ذکر ءِ کرے۔ نائب وزیراعظم سینیٹر محمد اسحاق ڈار دولت مشترکہ نا سیکرٹری جنرل ءِ پارے کہ وزیراعظم شہباز شریف اکتوبراٹی ’اپیاساموآ‘ ٹی مروک آ دولت مشترکہ نا سروک حکومت نا دیوان اٹی بشخ ہلنگ نا چاری ءِ۔ اوپارے کہ ستمبر اٹی دولت مشترکہ نا وزراء خارجہ نا دیوان نا وخت آ او شریک ہم منصب آتون گپ وتران کیک۔ داوخت آ سیکرٹری جنرل پیٹریشیا سکاٹ لینڈ پاکستان نا کنڈآن دولت مشترکہ نا پدریسہ مخ تفی نا ستاءِ کرے۔ اوپارے کہ او 2022 نا بھسکار نوکاپ آن پد پاکستان نا دورہ ءِ کننگ اٹی ءِ تانکہ او دا خننگ کے کہ پاکستان ہراوڑ دُوارہ جھک سلیسنے ہرا33 ملین آن زیات پاکستانی تے زہمی کرے و اوفتیان 20 لکھ اُراو روزگار آن محروم کرے۔ دولت مشترکہ نا سیکرٹری جنرل پیٹریشیاسکاٹ لینڈ دولت مشترکہ نا اصول آتیکن پاکستان نا عزم انا ستاءِ کرساپارینے کہ پاکستان نا 30 سال آن کم وئی نا 65 درسد آبادی نئے بیرہ آخبت نا راہشونی مریک بلکن دولت مشترکہ ءِ اسہ گچین آخبت اس جوڑ کننگ اٹ ہم کمک ایتک۔ اسہ سوج اسے نا ورندی ٹی نائب وزیراعظم و وزیرخارجہ سینیٹر محمد اسحاق ڈار پارے کہ پاکستان گپ وتران نا کمک اٹ امن و شونداری کون آ قدر ءِ برقرارتخک بلکن آجوئی و وتواجہی نا شرف ءِ کیک۔ اوپارے کہ پاکستان دولت مشترکہ ءِ اہم ویل آتیا امنائی سلاہ ودی کننگ کن اسہ فورم اسے نا وڑاٹ ہرک۔ اوپارے کہ پاکستان تینا جغرافیائی محل و قوع اٹ تینے واپار کن اسہ علاقائی مرکز اسے ناوڑاٹ تصور کرینے انتئے کہ علاقائی رابطہ ورناتیکن روزگار نا وارخواہی ودی کیک و کمکاری کن حالیت ودی کیک۔ اوسیکرٹری جنرل پیٹریشیاسکاٹ لینڈ نا 2030 اسکان انٹراکامن ویلتھ واپار ءِ 2 ٹریلین ڈالر اکان ودفنگ نا وژن نا ہم ستاءِ کرے۔ دولت مشترکہ نا سیکرٹری جنرل پارے کہ دولت مشترکہ ٹی 2.7 ارب بندغ یا دنیا نا اسہ تہائی بشخ اس اوار ءِ، دولت مشترکہ نا ریاست آتون واپار ایلو ملک آتا مقابلہ کیہی زیات ترند، اڑزآن و آسان ءِ۔ دولت مشترکہ نا سیکرٹری جنرل پیٹریشیا سکاٹ لینڈ سرکاری سلہ غا پاکستان نا پنچ دے ئی دورہ ءِ کننگ اٹی ءِ۔