وزارت جان جوڑی مون انگا زڑدوئی نا چٹفنگ کن مربوط حکمت عملی اس جوڑ کرینے، ڈاکٹر مختاراحمد بھرتھ

اسلام آباد۔ 28 جولائی (اے پی پی) کوآرڈینیٹر جان جوڑی ڈاکٹر مختار احمد بھرتھ پارینے کہ بنجاو ہر چار آ صوبہ غاتا شریداری اٹ 68 ارب روپئی نا خڑچ آن مون انگا زڑدوئی نا توننگ نا وزیراعظم نا پروگرام نا بناءِ کننگ انگ ءِ، وزارت جان جوڑی مون انگا زڑدوئی نا چٹفنگ ءِ پک کننگ کن اسہ مربوط حکمت عملی اس جوڑ کرینے۔ شنبے نادے آ مون انگا زڑدوئی نا جہانی دےانا رداٹ تینا کلہو اٹی کوآرڈینیٹر جان جوڑی پارے کہ پاکستان اٹ مون انگا زڑدوئی آن زہمی کیس کم و ود 98 لکھ ءُ۔ ڈاکٹر مختار احمد پارے کہ وزیراعظم مون انگا زڑدوئی نا چٹفنگ نا پروگرام نا بناءِ کننگ انگ ءِ، بنجاو ہر چارآ صوبہ غاتا شریداری اٹ 68 ارب نا پروگرام نا بناءِ کننگ انگ ءِ ہرانا مسخت پاکستان اٹ مون انگا زڑدوئی نا توننگ ءِ۔ ڈاکٹر مختاراحمد بھرتھ پارے کہ مچ آ ملک اٹی دُوانزدہ سال آن زیات وئی نا آبادی نا سکریننگ  ءِ کننگک، ملک گیر سکریننگ و درمان نا آسراتی اسکان نا رسینگ مخلوق ءِ مفت فراوان کننگک، پاکستان اٹ مون انگا زڑدوئی ان چٹفنگ نا پکا عزم کرینے، دترآن تالان مروک آ انفیکشن مون انگا زڑدوئی زہمی دترنا گدریفنگ آن تالان مریک۔ اوپارے کہ مون انگا زڑدوئی آن بچنگ نا گچین وڑوڈول دین انا متنقلی والا عوامل نا بارواٹی احتیاط کننگے۔ وخت اس ہم ہموگڑاتے کاریم اٹ اتپس ہرافتیا ایلو مخلوق نا دترلگوک مرے، مدام غیراستعمال شدہ استرا، بلیڈ و ایلو گڑاڈسپوزیبل یعنی اسہ ہی وار کاریم اٹ اتوک آ گڑاتے کاریم اٹ اتیر۔ ڈاکٹر مختار احمد پارے کہ انجیکشن لیسن یافتہ پریکٹیشن آتا زیر انتظام و غیر استعمال شدہ یعنی ڈسپوزیبل سیلہ/سرنچ کاریم اٹ اتیر، اسہ ہی بندغ آ کاریم اٹ اتوک آ جراثیم آن پاک ٹول آتا کمک اٹ خف/بامس  ءِ خلفر۔ اوپارے کہ دترنا زڑدوئی دین آن پاک مننگ ءِ پک کننگ کن مدام سکرین مروک دتر خلفر۔ بے رکھ جنسی عمل یا تعلقداری آن پاناد کیر۔