اسلام آباد۔ 28 جولائی (اے پی پی) وزیراعظم محمد شہباز شریف مون انگا زڑدوئی ناچٹفنگ نا مچ آ ملک مہم نا بناءِ کننگ نا پڑو کرسا پارینے کہ مون انگا زڑدوئی نا توننگ، تشخیص و درمان کن دمدستی وڑاٹ کاریم کننگ نا گرج ءِ، حکومت زڑدوئی نا سوب آن مون تروک چیلنج آتا مون ءِ توننگ کن سنبرینگوک ءِ، مون انگا زڑدوئی نا چٹفنگ نا پروگرام نا رداٹ پاکستان نا ہر شاری ءِ مون انگا زڑدوئی کن اسکریننگ و درمان نا آسراتی اسکان مفت رسینگ دوئی مریک، ننے دا ناجوڑی ءِ چٹفنگ و غٹ اکن دراخ جوڑ آخبت اسے پک کننگ کن اواری اٹ کاریم کننگ نا گرج ءِ۔ شنبے نادے آ وزیراعظم آفس نا میڈیا ونگ آن جاری پریس ریلیز نا رداٹ زڑدوئی آن آگاہی نا جہانی دے انا وخت آ تینا کلہو اٹی وزیراعظم شہباز شریف پارے کہ دا سال زڑدوئی نا جہانی دے انا سرحال ‘‘دا عمل نا وخت ءِ’’ ننے یات ترفک کہ ننے زڑدوئی نا توننگ ، تشخیص و درمان کن دمدستی وڑاٹ کاریم کننگ نا گرج ءِ، اینونادے یات ترفک کہ نن زڑدوئی نا چٹفنگ نا بابت گام گیج آتیٹی تاخیر ءِ سگنگ کپنہ، ننے دا ناجوڑی ءِ چٹفنگ و غٹ اکن دراخ جوڑ آخبت اسے پک کننگ کن اواری اٹ کاریم کننگ ناگرج ءِ۔ وزیراعظم پارے کہ زڑدوئی اسہ چپ ءُ دین اسے ہرا مچ آ دنیا ٹی لکھ آ مخلوق ءِ زہمی کیک، ہراڑآن جغر اٹی سوزش ودی مریک و اگہ وخت آ درمان کننگپ تو گمانی وڑاٹ بھاز پیچیدگی ودی مننگ کیک، پاکستان اٹی اسہ بھاز بھلو آبادی اس مون انگا زڑدوئی انفیکشن آن زہمی ءِ، جہانی کہول آ 60 ملین مون انگا زڑدوئی کیس آتیان 10 ملین زہمی کیس پاکستان اٹی ءُ۔ گڑتی ءِ کہ اگہ وائرل زڑدوئی نا توننگ و چٹفنگ کن المی گام گیج کننگتو تو نن جغرنا کینسر نا دین ءِ ہم ہُننگ کینہ۔ وزیراعظم پارے کہ بحیثیت قوم ، نن آگاہی مہم، ویکسی نیشن پروگرام، جاچ و درمان اسکان گچین رسینگ نا کمک اٹ وائرل زڑدوئی تون مون تننگ اٹ اہم پیش رفت کرینن، ولے داسکان بھازکاریم کننگ سلوک ءِ، ننے زڑدوئی نا توننگ ءِ اولیت تروئی ءِ، زوت تشخیص ءِ پک کننگ و غٹ اکن اڑزان و رسینگ نا قابل درمان فراوان کننگ ءِ۔ وزیراعظم پارے کہ بطور وزیر اعلیٰ پنجاب کنادور اٹی پاکستان کڈنی اینڈ لیور ٹرانسپلانٹ انسٹی ٹیوٹ اس جوڑ کریٹ ہراکہ اسہ مزل نا نشان اسے۔ پنجاب نا غٹ 36 ضلع غاتیٹی زڑدوئی نا بابت پوسکن آ فلٹر کلینک آتون بِک و جغر نا مریض آتے پوسکن آ طبی آسراتی فراوان کننگا۔ وزیراعظم پارے کہ حکومت زڑدوئی نا سوب آن مون تروک چیلنج آتامون ءِ توننگ کن سنبرینگوک ءِ، دابابت کنے اسہ مچ آ ملک مہم، ہرانا مسخت مون انگا زڑدوئی ءِ چٹفنگ ءِ، نا پڑو ءِ کرسا خوشی مننگ ءِ۔ ننا چکار جاچ و درمان نا ہندآتا گچینی آمریک۔ داہیت ءِ پک کننگک کہ فراوان کروک آ خذمت ننا شاری تا گرج آتا رداٹ مریر۔ وزیراعظم پارے کہ ای باوری کرفیوہ کہ پاکستان نا ہرشاری ءِ مون انگا زڑدوئی کن سکریننگ و درمان نا آسراتی اسکان مفت رسینگ دوئی مریک۔ داگام انا بنداوی مسخت ایچ سی وی آن زہمی بندغ آتا جان جوڑی و آسودہی ءِ گچین کننگ ءِ وخت اس کہ داڑتون اوار اوار اونا نسخان آتے کم کننگ، جغرنا کینسر و داناجوڑی آن وخت آن مست مرک انا گڑتی تے کم کننگ ءِ۔ وزیراعظم پارے کہ ببو زڑدوئی نا دا جہانی دے آ ، نن زڑدوئی نا بابت آگہی، وائر زڑدوئی آن زہمی بندغ آتا کمک ءِ کننگ و داناجوڑی نا بھاریم آن آجو آخبت کن کاریم کننگ نا تینا کوشست آتیٹی یکجا مرین، نن غٹ اواری اٹ اسہ دراخ جوڑ و زیات شونہال قوم اس جوڑ مننگ کینہ۔
