اسلام آباد۔ 27 جولائی (اے پی پی) وزیراعظم یوتھ پروگرام نا چیئرمین رانا مشہود احمد خان پارے کہ کراچی آفس سندھ اٹی ورناتا شونداری ءِ مون آدننگ اٹ اہم ءُ کڑد اس ادا کیک، کراچی آفس نا بنااتون وزیراعظم یوتھ پروگرام نا رسینگ اٹ ودکی مسنے۔ پرائم منسٹرز آفس یوتھ افیئر زونگ انا کنڈآن جاری بیان نا رداٹ داخیال آتا درشانی ءِ چیئرمین وزیراعظم یوتھ پروگرام رانا مشہود احمد خان کراچی ٹی دفترنا بناء نا وخت آ گپ وتران کرساکرے۔ سندھ انا ورناتے واکدار کننگ کن اسہ اہم ءُ گام اسے نا وڑاٹ وزیراعظم یوتھ پروگرام پاکستان نا ورناتا لائخی تے مون آ اتنگ نا تینامشنءِ مون آ درسا کراچی ٹی تینا دفترجوڑ کرینے۔ چیئرمین وزیراعظم یوتھ پروگرام رانا مشہود احمد خان دفترنا بناءِ کرسا تعلیم، کسب نا تربیت و انٹرپرینیورشپ نا وارخواہی ودی کننگ نا پروگرام نا عزم آ زور شاغا۔ اوپارے کہ فہد شفیق ءِ دفترنا سروک و ڈیہہ اٹی گام گیج آتے نافذ کننگ کن کوآرڈی نیٹر مقرر کننگانے۔ اوپارے کہ کراچی آفس سندھ اٹی ورناتا شونداری ءِ مو ن آ دننگ اٹ اہم کڑد اس اداکیک، نن ورناتے سرسہبی و پاکستان نا شونداری ٹی تینا بشخ ءِ شاغنگ کن درکار کسب و وسیلہ فراوان کننگ کن وقف ءِ۔ اوپارےکہ پرائم منسٹر یوتھ پروگرام نا مہالو آن مچ آ ملک اٹی نمان اثرمرتب مسنے و کراچی آفس تینا رسینگ ءِ پین ودفک۔ دا دفتر بشمول کسبکاری نا تربیت، انٹرپرینیور شپ سپورٹ، تعلیم و اسکالر شپ ناوارخواہی و کیریئر کونسلنگ تون اوار بھاز انگا گام گیج پیش کیک۔ داوخت آکراچی آفس نا کوآرڈی نیٹر فہد شفیق تینا خیال آتا درشانی ءِ کرساپارے کہ ای کراچی آفس نا کماشی ءِ کننگ و سندھ انا ورناتتون اواری اٹ اوفتا لائخی تے مون آ تننگ کن سنبرینگوک اُٹ، نن ورناتا سرسہبی ٹی کمک کننگ کن وارخواہی و وسیلہ فراوان کننگ کن سخت خواری کینہ۔ دود اٹی سرکاری آفیسر، ورناتا نمائندہ، و تعلیم و نجی بشخ آتیان تعلق تخوک آ اسٹیک ہولڈر آک بشخ ہلکر، ہرافک پروگرام نا کراچی ٹی ودکی نا ستاءِ کریر۔
