اسلام آباد۔ 27 جولائی (اے پی پی) بنجائی وزیر پیٹرولیم مصدق ملک اپوزیشن ءِ اسہ وار ولدا مذاکرات نا سلہ خلسا پارینے کہ ملک انا شونداری کن خار و بے چیٹی نا سیاست ءِ دفن کروئی مریک، بے چیٹی نا سیاست کروک آ ک ملک انا خیرخواہ افس، پاکستان ارے تو نن ارین، سیاست ارے، ملک دشمن زموار آک ملکی شونداری ٹی اڑاند بش کننگ اٹی ءُ، ملک آن نیزگار و بے روزگاری ءِ چٹفنگ و پدسلوک علاقہ غاتا شونداری وزیراعظم نا وژن ءِ۔ ہفتہ نادے آ بنجائی وزیر پیٹرولیم مصدق ملک نیوز کانفرنس آن تران کرسا پارے کہ ملک اٹی ہرکنڈآ ہڑدڑ نا سیاست مننگ اٹی ءِ، داوڑاٹ حکومت نا کنڈآن الس نا راجی آسودہی کن ہرا گام گیج آتے کننگ انگ ءِ اوفتیان معلومدار کننگ المی ءِ، حکومت الس ءِ ریلیف فراوان کننگ کن کوشست کننگ اٹی ءِ۔ وزیراعظم شہباز شریف خواہک کہ مکل اٹی روزگار نا فراوانی پک مرے، کبینی چٹے و پدسلوک آ علاقہ و ہموجاگہ نا باتی تے ملک انا ایلو علاقہ غاتا بریبر اتنگے، کبینی نا چٹنگ آن الس آ بھاریم کم مریک۔ اوپارے کہ ملک اٹی داوخت آ خوارج نا جلہوبرجاءِ، عمران خان نا ہرہیت آ اونا مخ تف آک لبیک پارہ ، اول فوج ءِ نیوٹرل مننگ نا ہیت ءِ کرے، ولدا پینترا بدل مس و پارے کہ نیوٹرل ساہدار مریک، ولدا پاننگاکہ چیف قوم انا باوہ مریک، ولدا باوہ ءِ میر جعفر پاننگا، ولدا امریکہ نا بارواٹی پاننگاکہ اوسازش کرے، فوج ءِ پاننگاکہ او داسازش آن بچفے، ولدا پینترا بدل کننگا و پاننگاکہ فوج ننے بھس کننگ اٹی ءِ، امریکہ ننا کمک ءِ کے، ولدا امریکی قرارداد نا ڈنکا ءِ خلنگا، ولدا اسٹیبلشمنٹ نا قبراسکان رند ءِ ہلنگ نا پاننگاو 9 مئی نا واقعہ مس ہراتم شہید آتا یات گار آتا بے شرفی ءِ کننگا، داسہ اسہ وار ولدا عمران خان پاننگ ءِ کہ اسٹیبلشمنٹ تون ہیت کینہ، مسلم لیگ (ن) ننے جنگ ترفنگ ءِ۔ اوسوج کرے کہ انت دا بہروپیہ غاک ءُ یا دیوانہ غاک ءُ ہراداوڑنا ہیت آتے کننگ ءُ و وار وار یوٹرین ہلنگ ءُ، اوفتا مسخت ہیت کننگ آخا بلکن ملک ءِ برباد کننگ ءِ، داٹرینڈ ءِ چلیفسا کریر کہ کیپٹن اف تو پاکستان اف، اوفتے بایدے شرم برے ، پاکستان ارے تونن ارین، ملک ءِ بھس کننگ نا بیان تننگا و اوڑآ عمل ہم کننگ اٹی ءُ۔ بنجائی وزیر پارے کہ تدوک آ سال ملک اٹی کبینی نا کچ 48 درسد ئس ہرادا تُو 2 درسداسکان بس، داننا کارکڑدءِ، کبینی نا جم کچ 38 درسد آن کم مرسا 12 درسد اتنگا، نن بے نظیر انکم سپورٹ پروگرام اٹ نیزگار مخلوق کن 600 ارب روپئی جتا کرین، اوکوویڈ آن پد نیزگار آتیکن اتوک آ 4 ارب ڈالر 100 سرمایہ دار آتے تسر، نن سرکاری بشخ انا شونداری پروگرام اٹی ریکارڈ ودکی کرین۔ اوپارے کہ داڑآن ملک اٹی روزگار نا وارخواہی ودی مریک، نن امنا کینہ کہ بجلی نا بھاریم ءِ ولے دا وخت اتون کم مریک، نن 86 درسد صارف آتا بجلی نابل آتیا پی ایس ڈی پی اٹ فنڈ کاٹ کرسا سبسڈی تسن، پین ہم غریب ءِ آسودہی ایتنہ۔ اوپارے کہ نن دہشت گردی نا چٹفنگ نا ہیت ءِ کینہ و داپانہ کہ نن آپریشن مننگ کن الیپنہ، انت دہشت گردی ، بھتہ خوری، مذہبی ہند آتیا جلہو اتا موکل تننگے۔ اوپارے کہ نن پانہ کہ ہیت و گپ کین، داپانہ کہ نن دھرناا یتنہ، پہیہ جام کینہ، انت دا شونداری، شونہالی و روزگار نا پہیہ جام کننگ خوانہ، نن اوفتے سلہ خلنہ کہ ہیت کبو، برباد کپبو، سلجھائفبو، الجھائفپبو۔ اوپارے کہ نن اوفتے سلہ خلکن کہ اوفتا زیات نشست ءُ تو داحکومت ءِ جوڑ کیر تو پار ، اوحکومت انت کن جوڑ کتور، پیپلزپارٹی ہم سپورٹ کرے ولے اوداوڑ کتور انتئے کہ اوفتا کاریم تعمیری آخا تخریبی ءِ، پھسات تالان کننگ ءِ، نن اوفتے دُوارہ سلہ خلینہ کہ ببو ہیت و گپ کین۔ اسہ سوج اسے نا ورندی ٹی بنجائی وزیر پارے کہ 9 مئی نا واقعہ غاک غٹ انا مون آٹو، کور کمانڈر ہاؤس آ جلہو کریر، پرامن برانز ہر اسٹ نا حق ءِ ولے الجھاؤ و سلجھاؤٹی پرخ کروئی مریک۔ اوپارے کہ داسو ودیامربھاشا ڈیم تیکن فنڈ جتا کننگانے، داڑآن روزگار نا وارخواہی ودی مریک، اوبلین ٹری نا بابت موقف اختیار کریسس کہ نن جہاز اٹ بج آتے بٹینن۔ اوپارے کہ ایف بی آر نا ڈیجیٹائزیشن کن ڈٹ بندی مننگ ءِ، ہسپتال آتا حالیت آتے گچین کننگ انگ ءِ، ریاستی ملکیتی ادارہ غاتا نجکاری کننگ انگ ءِ ہراگڑاک نیزگار مخلوق آ بھاریم ءُ اوفتے چٹفنگ انگ ءِ۔ اسہ سوج اسے نا ورندی ٹی اوپارے کہ آئی پی پیز نا باندات ءِ ایسر کینہ۔ اوپارے کہ گیس انا پوسکن آ ٹیرف اٹی ہچ ءُ ودکی اس کننگتنے۔ ایل این جی نا کنکشن آ پابندی ءِ ، دا بابت غٹ محرکات آتے میڈیا نا مون آ تخنہ۔ اوپارے کہ 200 یونٹ بجلی ناحامل 86 درسد صارف آتا بل آتیا 3 تُو اکن 50 ارب روپئی نا ودکی ٹیرف حکومت ایتک اوکان پد دُوارہ کمیٹی فیصلہ کیک۔ اوپارے کہ ہشت ہشت اے سی چلیفوک آتے تینا بھاریم ءِ تینٹ ہرفوئی تمک اونا سوب آن ودکی بجلی خلوئی تمک ہرافتا بھاریم ءِ ہموفک ہرفرہ۔ اوپارے کہ ہراتم اسکان کاریم اسے ٹی نیزگار الس نا رکھ مفک وزیراعظم اونا منظوری ءِ تفک۔
