جہانی برادری اسرائیل نا جنگی ڈوہ تا محاسبہ ءِ کرسا اوڑآن حساب ہلنگے، وزیراعظم شہبا زشریف

اسلام آباد۔ 27 جولائی (اے پی پی) وزیراعظم محمد شہباز شریف فلسطین نا علاقہ خان یونس اٹی برجااسرائیلی فورس آتا پرتشدد کارروائی تا  ترندی اٹ مذمت و بھاز گڑتی نا درشانیءِ کرسا پارینے کہ جہانی برادری اسرائیل نا جنگی ڈوہ تا محاسبہ ءِ کرسا اوڑآن حساب ہلنگے، فلسطین اٹی انسانی المیہ اس ودی مسنے، اقوام متحدہ تون اوار جہانی برادری تینا زمواری تے پورو کے۔ ہفتہ نا دے آ وزیراعظم آفس نا میڈیا ونگ آن جاری بیان نا رداٹ وزیراعظم پارے کہ خان یونس اٹی اسرائیل نا بربریت نا سوب آن یک و نیم لکھ آن زیات فلسطینی بے اُرا مسنو، خان یونس نا گھیڑآن علاقہ ٹی کنوئی آ گڑاو ایلو زند انا گرج آتا فراوانی بند مسنے، فلسطین اٹ انسانی المیہ اس ودی مسنے، اقوام متحدہ تون اوار جہانی برادری تینا زمواری تے پورو کے۔ وزیراعظم پارے کہ اسرائیلی فورس آک فلسطینی تا نسل کشی نا بھلا ڈوہ انا مرتکب مننگ ءُ ، پاکستان جہانی عدالت انصاف اٹ تینا بیان اٹی فلسطینی تا حق خودارادیت و اسرائیل نا کنڈآن فلسطینی تیا کروک آ ظلم آتیا پبی توار بڑزکرے۔ وزیراعظم پارے کہ نن دا خواست ءِ ولدا  کینہ کہ جہانی عدالت انصاف نا فلسطین نا حالیت آتا بابت ساڑی آ فیصلہ و اقوام متحدہ نا قرارداد آتیا عملدرآمد کرفنگے۔ اوپارے کہ داتم اسکان پاکستان آن پاکستان ایئرفورس نا 6جہاز آتا کمک اٹ 1200 ٹن و 3 بحری جہاز آتا کمک اٹ 1500 ٹن کمکی گڑا فلسطین آ گدریفنگانے، پاکستان نا میڈیکل کالج آتیٹی فلسطین نا میڈیکل نا طالب علم آتیکن خصوصی بست وبند نا پارت کرینے تانکہ او تینا تعلیم نا چرجوئی ءِ برجاتخنگ کیر۔ وزیراعظم پارے کہ جہانی برادری اسرائیل نا جنگی ڈوہ تا محاسبہ ءِ کرسا اودے عدالت نا مون آ سلفنگے ، پاکستانی حکومت و الس تینا فلسطینی ایلم و ایڑھ تتون سلوک ءِ۔