اسلام آباد۔26جولائی (اے پی پی): مزن وزیر محمد شہباز شریف ءَ گوں تاجکستان ءِ سفیر شریف زادہ یوسف طائر ءَ آدینگ ءِ روچ ءَ مزن وزیر گس ءَ گند ءُ نند کت۔ اے موہءَ مزن وزیر ءَ تاجک سفیر ءِ وش اتک کنان ءَ پاکستان ءَ آئی ءِ پوسٹنگ ءِ وھد ءُ پاس ءَ کامیاتی ءُ ءُ نیکیں واھشت آنی درشان کت۔ پی ایم کارگس ءِ میڈیا ونگ ءِ نیمگ ءَ جا ڑی بوتگیں پریس ریلیز ءِ رد ءَ گند ءُ نند ءِ ساھت ءَ گوزوکیں ماہ دوشنبہ ءَ وتی استیں تر ءُ تاب ءِ تران کنان ءَ مزن وزیر ءَ گوشت کہ آ تاجک صدر امام علی ءِ رحمنٰ ءِ پر مڈائیں وش اتک ءَ چہ سک باز گل ءُ شات بوتگ آں ءُ تر ءُ تاب ءِ ساھت ءَ دوئیں سروک آنی نیام ء آسری تران بوت۔ وتی تر ءُ تاب ءِ ساھت ءَ دوئیں ملک آنی نیام ءَ منوگری بوتگیں تپاک نامہ آنی سر ءَ دل یکیمی ءِ درشان کت۔ مزن وزیر ءَ زور پر داست کہ ایشاناں وھد ءُ موہ ءَ پد ءُ رند ءُ یکوئی ءَ گیش مھکم کنگ ءَ کمک رسیت۔ مزن وزیر ءَ صدر رحمٰن ءَ را زور پاکستان ءِ سرکاری تر ءُ تاب کنگ ءِ دعوت ءَ دیان ءَ گوشت کہ پاکستان اے سال اکتوبر ءَ اسلام آباد ءَ بوھوکیں شنگھائی کمکی گل آنی حکومت ءِ سروک آں گوں دیوان ءَ تاجکستان ءِ شریک بوھگ ءِ وداریگ انت۔ تاجک سفیر ءَ مزن وزیر ءَ را وانگ ءُ زانگ، کشت ءُکشار ءُ دیمپانی ءَ ھوار جتا جتائیں شوبگ آنی تہ ءَ دو نیمگی دیمروئی ءُ زمینی ءُ بالی کشک آنی وسیلگ ءَ رابطہ آناں ودینگ ءِ ھوالگ ءَ شور ءُ مشور پیش کت۔ مزن وزیر ءَ سیادی داروکیں کارندہ آناں تاجک سفیر ءَ گوں رابطہ کنان ءَ اے شو ءُ مشور آنی پد ءُ رند کنگ ءِ واستہ کار رپک رد ءُ بند کنگ ءِ پنت ءُ شون کت۔ گند ءُ نند ءَ کاسا-1000 ءَ ھوار دمگی رابطہ آنی ایندگر منصوبگ ھم باست ءُ واستہ بنت۔ تاجک سفیر ءَ مز ن وزیر ءِ وش اتک کنگ ءِ پد ءَ شگر ءُ منت واری گپت۔ آئی ءَ تاجک صدر ءِ نیمگ ءَ چہ مبارک بات پیش کت ءُ پاکستان ءِ: گوما وتی یکوئی آناں گیش دیمروئی دیگ ءِ واھشت ءِ درشان کت۔
