اسلام آباد۔ 26 جولائی (اے پی پی) بنجائی وزیر واپار جام کمال خان پارینے کہ ڈیہہ اٹی پائیدار شونداری ءِ مون آ دننگ کن پبی و نتیجہ غاتیا تالان پالیسی تا گرج ءِ۔ داخیال آتا درشانی ءِ او اسلام آباد اٹی ای سی او نا سیکرٹری جنرل سفیر خسرونوزیری تون تینا دفتراٹی اوڑدہی کرساکرے۔ اوڑدہی ٹی علاقائی واپار و اقتصادی کمکار تنظیم (ای سی او) نا آخبت نا سمت آ گپ وتران کرے۔ اوڑدہی ٹی وزیر واپار جام کمال خان سفیر نوزیری نا ای سی اوٹی بھلا خذمت آتا ستاءِ کرسا داپت انا درشانی ءِ کرے۔ اوڑدہی ٹی سفیر نوزیری ای سی او نا ساڑی آ سرجزآتا جاچ پیش کرے و تنظیم نا علاقائی و جہانی اثرورسوخ ءِ ودفنگ نا مسخت آن جاری اصلاحات آ زور شاغا۔ اواومیت ظاہر کرے کہ دا اصلاحات پوسکن آسیکرٹری جنرل نا رداٹ برجاسلک ہراڑآن تنظیم ءِ سوگوی ملک۔ اوڑدہی ٹی بین الاضلاع واپار ءِ مون آدننگ و باسک ملک آتا نیام اٹ رابطہ غاتے ودفنگ نا بابت گپ وتران کننگا۔ ہڑتوم آکنڈآک ای سی او ویژن 2025 نا پیش رفت نا جاچ ءِ ہلکر۔ ہرا2017 ٹی اسلام آباد اٹی 13 می ای سی او سروکی دیوان اٹی تینا کننگاسس۔ وزیر واپار پارے کہ جہانی کہول آ واپاری کمکاری ءِ ودفنگ کن 126 ملک آتیکن پاکستان ویزا فری پالیسی اس ترتیب تسنے۔ سفیر نوزیری ای سی او نا بانی باسک مننگ نا ناطہ واپاری و سیاسی ہڑتوم آ بشخ آتیٹی تنظیم اٹی پاکستان نا اہم کڑد ءِ امنا کرے۔ اوسیکرٹری جنرل ءِ ای سی او نا اصلاحاتی ایجنڈاکن پورو مخ تفی نا باوری کرفے و بین الاضلاعی واپار ءِ ودفنگ کن پاکستان نا عزم نا درشانی ءِ کرے۔ سفیر نوزیری پاکستان نا مہمان نوازی آ منت واری نا درشانی ءِ کرے و باسک ملک آتا نیام اٹ پدریسہ کمکاری نا اہمیت آ زور شاغا۔ نوزیری چاگڑداٹی پاکستان نا کڑد و پاکستان نا گام گیج آتا ہم ستاءِ کرے۔ اونیامی ایشیاو سویلی ایشیانا نیام اٹ تعلقداری تے سوگو کننگ کن جارجیا و آرمینیا ءِ اوار کرسا ای سی او ءِ ودفنگ ناسلاہ پیش کرے، ہراٹی پاکستان قائدانہ کڑ د اداکیک۔ گچین رابطہ غاتا گرج ءِ تالان کرسا نوزیری کوئٹہ تفتان راہداری نا بحالی ءِ گچین علاقائی انضمام کن بھاز اہم گوندا۔
