کوئٹہ۔ 26 جولائی (اےپی پی) ڈائریکٹر جنرل بلوچستان ہیلتھ سروسز داکٹر امین مندوخیل وزیراعلیٰ بلوچستان نا سلاہکار محکمہ شونداری نسواں ڈاکٹر ربابہ خان بلیدی تون اوڑدہی کرے۔ اوڑدہی ٹی بلوچستان اٹی جان جوڑی نا خذمت آتا ساڑی آ حالیت و زالبول ہیلتھ کیئر پروفیشنل آتے مون تروک چیلنج آتیا گپ وتران کننگا۔ ڈاکٹر امین مندوخیل بلوچستان ہیلتھ ڈیپارٹمنٹ نا کنڈآن تروک آ جان جوڑی نا خذمت آتون اوار زالبول ڈاکٹر، نرس، و میڈیکل ٹیکنیشن آتے مون تروک ویل آتیا حوال تس ، ڈی جی ہیلتھ سروسز بلوچستان تون گپ وتران کرسا ڈاکٹر ربابہ بلیدی نا پاننگ ئس کہ بلوچستان نا بیرہ 22 درسد آبادی ءِ بنداوی جان جوڑی نا خذمت اسکان رسینگ دوئی ءِ ہرانا دنگ ءِ ودفنگ کن جوان گام گیج کننگ انگ ءِ و پبلک پرائیویٹ پارٹنر شپ انا رداٹ جان جوڑی نا آسراتی تے ہربندغ نا دسترس اٹی اتنگ کن گیشتر مدی پروگرام بناکننگ انگ ءِ، وزیراعلیٰ نا سلاہکار پڑو کرے کہ ویمن ڈویلپمنٹ ڈیپارٹمنٹ زوت ہیلتھ ڈیپارٹمنٹ اتون مفاہمتی یات داشت آ دستخط کیک۔ دامفاہمتی یات داشت نا کمک اٹ بلوچستان اٹی زالبول آتے مون تروک جان جوڑی نا ویل آتے ایسر کننگ کن اسیجائی کوشست آتا آسراتی فراوان کننگک۔ ’’ دا کمکاری ننا زالبول ہیلتھ کیئر پروفیشنلزکن اسہ کمکار چاگڑد اس جوڑ کننگ و مچ آ صوبہ ٹی زالبول آتیکن جان جوڑی نا خذمت آتے گچین کننگ کن مثبت کڑد ادا کیک‘‘ ڈاکٹر ربابہ خان بلیدی باوری کرفے کہ محکمہ ترقی نسواں نا کنڈآن صوبہ نا زالبول ڈاکٹر، نرس و میڈیکل ٹیکنیشن آتے مون تروک ویل آتاایسری کن المی گام گیج کننگک۔ زالبول آتا جان جوڑی آ آسودہی غٹ آن اہم ءِ۔ زالبول ڈاکٹر، نرس و میڈیکل ٹیکنیشن ننا طبی نظام اٹی اہم ءُ ہند اس تخرہ، دا بھاز بے کچ المی ءِ کہ نن اوفتا ویل آتے دمدستی وڑاٹ ایسر کین، ڈاکٹر بلیدی بلوچستان اٹی جان جوڑی نا نظام ءِ گچین کننگ کن اسیجائی کوشست آتا اہمیت آ ہم زور شاغا۔
