اسلام آباد۔25جولائی (اے پی پی): مزن وزیر محمد شہباز شریف ءَ گوشتگ کہ پاکستان معیشت گہتری ءِ نیمگ ءَ رھادگ انت، پاکستان ءِمعیشت ءِ برجائی ءِ واستہ ترندیں پیسلہ کنگ کپ ائیت۔ ما ریاست ءَ را سیاست ءِ سر ءَ ترجی دیان ءَ ملک ءَ را ڈکال ءَ چہ رکھینتگ۔ خیبر پختونخوا ھاسیں رنگ ءَ ھوار بوتگیں ضلع آنی دیمروئی حکومت ءِ اولی ترجی آنی تہ ءَ ھوار انت۔ اے ضلع آنی گہتر یں وانگ ءُ زانگ ءِ پجاری ءِ واستہ دانش سکولز آنی جوڑیشت کنگ بیت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ پریس ریلیز ءِ رد ءَ مزن وزیر محمد شہباز شریف ءَ گوں خیبر پختونخوا ءِ راجی ءُ صوبائی اسمبلی باسک آں اسلام آباد ءَ گند ءُ نند کت۔ گند ءُ نند ءَ نائب مزن وزیر ءُ وزیر ءِ درئی کار اسحاق ڈار، کشمیر ءِ کار ءُ گلگت بلتستان آنی ھوالگ ءَ وزیر انجینئر امیر مقام، گورنر خیبر پختونخوا فیصل کریم کنڈی ءُ سیادی دروکیں کارندہ ساڑی اتنت۔ گند ءُ نند ءَ گچین بوتگیں نماھندگ آں مزن وزیر ءِ سروکی ءَ پاکستان ءِ معیشت ءِ گہتری ءِ ھوالگ ءَ توسیپ ءُ ستا پیش کت۔ گند ءُ نند ءَ خیبر پختونخوا ءَ گوں سیادی داروکیں باسک آں مزن وزیر ءَ را وتی وتی دمگ آنی جیڈھ آنی ھوالگ ءَ سرپد کت۔ اے موہ ءَ مزن وزیر ءَ ھدا وند ءِ شگر ءُمنت واری ءَ پاکستان ءِ معیشت ءِ جوانیں کشک ءَ رھادگ اِنت۔ مزن وزیر ءَ گوشت کہ سرجمیں ملکءَ ٹیوب ویلز آناں سولر سسٹم ءَ شفٹ کنگ بوھگ ءَ انت، کشت ءُ کشاری ٹیوب ویلز آناں سولر ھاٹیگ ءِ سر ءَ شفٹ کنگ ءَ چہ ناں ایوکءَ کشت ءُ کشاری شوبگ ءَ دیمروئی بیت، دھکان آناں کمو ھرچ ءُ درچ ءَ توان پجاری بیت۔ کشت ءُکشاری زمین آنی تہءَ گیشی بیت ، ڈن ملک ءَ انرجی بھا زورگ ڈالر آنی بچت بیت ، ایش ارابانی ڈالر انت۔ انوں زوتاں گریب ءُ بزگریں مردم آناں توان ءِ بل آنی تہءَ ٹوھیں ریلیف ءِ پجاری کتگ۔ مزن وزیر ءَگوشت کہپاکستان ءِ معیشت ءِ برجائی ءِ واستہ ترندیں پیسلہ کنگ کپتگ، ما ریاست ءَ را سیاست ءِ سر ءَترجی دیان ءَ ملک ءَ را ٹوھیں تاوان ءُڈکال ءَ چہ رکھینتگ۔ مزن وزیر ءَ گوشت کہ شما درست وتی وتی دمگ آنی تہءَ باز جہد ءُ کوشست بکن انت۔ الس آناں ریلیف پجاری ءِ اولی کار بہ بیت۔ مزن وزیر ءَ نائب مزن وزیر ءِ سروکی ءَ یک کمیٹی ءِ جوڑ کت ایش خیبرپختونخوا ءَ گوں سیادی داروکیں گچین بوتگیں نماھند گ آنی جیڈھ آناں پٹ ءُ پول انت ءُ ایشانی گیواری ءَ شوہاز اَنت۔
