اسلام آباد۔ 25 جولائی (اے پی پی) بنجائی وزیر واپار جام کمال خان پارینے کہ ایف پی سی سی آئی پاکستان اٹ واپار و صنعت نا نمائندگی ءِ کروک آ بڑزکو ادارہ ءِ، حکومت پوریاگر برادری نا گچینی کن ہرپلیٹ فارم آ اوفتا مخ تفی ءِ برجاتخک۔ داخیال آتا درشانی ءِ او فیڈریشن آف پاکستان چیمبر آف کامرس اینڈ انڈسٹریز (ایف پی سی سی آئی) نا صدر عاطف اکرم شیخ نا کماشی ٹی وزارت واپار نا دورہ ءِ کروک آ ڈل اتون گپ وتران کرساکرے۔ ڈل بنجائی وزیر ءِ شنگھائی کمکار تنظیم بزنس اینڈ انویسٹمنٹ کانفرنس 2024 ٹی بشخ ہلنگ نا سلہ خلک ہرا 11، 12 ستمبر آاسلام آباد نا جناح کنونشن سینٹر اٹی اڈ ہلیک۔ بنجائی وزیر واپار ڈل انا کنڈآن تروک آ سلہ ءِ امنا کرے و پاکستان نا کاروباری بشخ ءِ مو ن آدننگ اٹ ایف پی سی سی آئی نا کڑد انا ستاءِ کرے و اوفتا جاری و آخبت نا گام گیج آتیکن پورو وزارتی کمکاری نا قول کرے۔ بنجائی وزیر ایس سی او کانفرنس نا اہمیت ءِ امنا کرے۔ اوڑدہی ٹی ایف پی سی سی آئی نا صدر عاطف اکرم شیخ پوریاگر برادری نا نیک است خواہی نا درشانی ءِ کرے و کانفرنس اٹ گمانی کاروباری وارخواہی تیا گپ وتران کرے۔ اوسعودی عرب، متحدہ عرب امارات، چین، روس و ایلو ملک آتا بروک آواپاری ڈل آتیٹی ایف پی سی سی آئی نا نمائندہ غاتے اوار کننگ نا اہمیت ءِ مون آتخا۔ بنجائی وزیر چین نا صنعت نا پاکستان آ گدریفنگ اٹ آسراتی فراوان کننگ اٹ ایف پی سی سی آئی نا کڑد آ ہم زور شاغا۔ اوچیمبر آزورشاغا کہ او دا منتقلی کن سازگار چاگڑد اس ودی کننگ اٹ زیات آن زیات بشخ ہلے۔ داکان بیدس اوایف پی سی سی آئی نا چین اتون اولیتی واپاری معاہدہ ٹی بھاز است خواہی نا درشانی ءِ کرسا چیمبر آن تینا سلاہ تے پیش کننگ نا پارے۔ وزیر واپار بزنس ٹو بزنس میچ میکنگ میٹنگ آتا اڈتننگ اٹ ایف پی سی سی آئی نا کوشست آتا ستاءِ کرے۔
