اسلام آباد۔ 25 جولائی (اے پی پی) پاکستان پارینے کہ او اقوام متحدہ نا سلامتی کونسل نا قرارداد آتا رداٹ جموں وکشمیر نا جھیڑہ نا انصاف وپرامن ایسری کن کشمیری تا سیاسی، سفارتی واخلاقی مخ تفی ءِ برجاتخک۔ ترجمان دفترخارجہ ممتاز زہرہ بلوچ پنچ شنبے نادے آ داڑے پریس حوال اٹی پارے کہ جنیوا ٹی انسانی حق انا کمیٹی زوت آتے اٹ بھارت نا چارمیکو پدریسہ رپورٹ آ سجفے کہ او شاری و سیاسی حق انا جہانی معاہدہ غاتا دفعہ غاتے ہراوڑ نافذ کیک۔ ترجمان پارے کہ کارروائی ٹی پبلک سیفٹی ایکٹ و پبلک سیکورٹی ایکٹ کون آ سخت کانود آتا رداٹ دزگیری و بھارت نا غیرکانودی وڑاٹ کوزہ ٹی جموں وکشمیر اٹی موبائل انٹرنیٹ سروس نا پدریسہ معطلی نا بارواٹی اہم سوج آتے ہرفنگا۔ اوپارےکہ دا بھارت نا غیرکانودی وڑاٹ کوزہ ٹی جموں وکشمیر اٹی انسانی حق انا خراب حالیت آتا بارواٹی جہانی انسانی حق انا مشینری نا پدریسہ خدشہ غاتے ظاہرکیک۔ ترجمان پارے کہ نن جہانی برادری آن خواست کینہ کہ او مقبوضہ جموں وکشمیر اٹی بھارت نا کنڈآن انسانی حق انا دا خلاف ورزی تا نوٹس ءِ ہلے و کشمیری الس آ ظلم و جور ءِ چٹفے۔
