اسلام آباد۔ 25 جولائی (اے پی پی) وزیراعظم محمد شہباز شریف پارینے کہ پاکستان ای سی او ملک آتا نیام اٹ علاقائی واپار نا مون آ دننگ و تنظیم نا اصلاحات نا ایجنڈا کن پورو مخ تفی ءِ برجاتخک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او اقتصادی کمکار تنظیم (ای سی او) نا دزکش مروک آ سیکرٹری جنرل خسرو نوزیری تون گپ وتران کرساکرے ہراپنچ شنبے نادے آ داڑے اوڑتون اوڑدہی کرے۔ اوڑدہی ٹی خسرونوزیری وزیراعظم ءِ ای سی او نا گام گیج و تینا تعیناتی ٹی ای سی او ءِ بحال کننگ نا تینا اصلاحاتی ایجنڈاغان معلومدار کرے۔ وزیراعظم ای سی او ءِ علاقائی کمکاری نا پلیٹ فارم نا وڑٹ مون آ دننگ کن سیکرٹری جنرل نا کوشست آتا ستاءِ کرے و آخبت کن نیک است خواہی نا درشانی ءِ کرے۔ وزیراعظم پارے کہ خسرو نوزیری پاکستان نافارن سروس اکیڈمی آن فارغ التحصیل ئس ہراکہ پاکستان کن شرفمندی نا ہیت اسے۔ وزیراعظم تاجکستان نا صدر امام علی رحمان کن ہم نیک است خواہی نا درشانی ءِ کرے۔ وزیراعظم پارے کہ پاکستان ای سی او ملک آتا نیام اٹ علاقائی واپار ءِ ودفنگ تون اوار اوار ای سی او اصلاحات نا ایجنڈا کن پورو مخ تفی ءِ برجاتخک۔ وزیراعظم پارے کہ ای سی او ویژن 2025 نا اہم دستاویز آ مسکوہی وزیراعظم محمد نواز شریف نا سرپرستی ٹی اسلام آباداٹی 2017 ٹی دستخط کننگاسس ہرا ای سی او کن اسہ بے کچ اہم ءُ مزل اسے۔ وزیراعظم داہم پارے کہ پاکستانءِ داہیت آ گمرءِ کہ ای سی او نا بروک آ سیکرٹری جنرل ڈاکٹر اسدمجید خان، پاکستان نا مسکوہی سیکرٹری خارجہ رہینگا۔ خسرو نوزیری ای سی او نا سیکرٹری جنرل نا حیثیت اٹ خذمت سرترسا پاکستان نا کنڈآن پدریسہ مخ تفی آ وزیراعظم نا منت واری ءِ ہرفے۔
