
اسلام آباد۔ 25 جولائی (اے پی پی) الیکشن کمیشن لس گچین کاری تیٹی زالبول آتا جنرل نشست آتیا 5 درسد ٹکٹ کوٹہ غا عملدرآمد کپننگ نا کیس انا سماعت ءِ 7 اگست اسکان پدبٹے۔ پنچ شنبے نادے آ کمیشن نا ممبر نثار درانی نا کماشی ٹی چار باسکی بنچ سماعت کرے۔ کمیشن اَرفے کہ زالبول آتے جنرل نشست آتیا 5 درسد نا کوٹہ تسوسس یاآخا، عملدرآمد رپورٹ پیش کننگے، اگہ زالبول آتے کوٹہ تننگتنے تو انت اکن تننگتنے، زالبول اومیتدار آتے گیشتر ٹکٹ ہمو حلقہ غاتیان تننگک ہراڑے پارٹی نا وونٹ مفک، 10 جماعت زالبول آتے پنچ درسد جنر ل نشست آ کوٹہ تننگ آعملدرآمد کتور۔ کمیشن ممبر اَرفے کہ اگہ پنچ درسد ٹکٹ زالبول آتے تننگپک تو اوناانت اثرات اس مریک۔ کمیشن کمامدارآک پاریر کہ جنرل نشست آ پنچ درسد ٹکٹ زالبول اومیتدار آتے تفننگ آ سیاسی جماعت نا گچین کاری نشان ءِ پدی ہلنگک۔ ممبر کمیشن پارے کہ ننا ریکارڈ نا رداٹ بی این پی مینگل زالبول آتے 3.84 درسد ٹکٹ تس۔ بی این پی مینگل نا وکیل اِراہفتہ نا موکل خواہس۔ تحریک لبیک پاکستان نا وکیل پارے کہ ننے ورندی جمع کرفنگ کن وخت تننگے۔ سلیمان خان قبائل موومنٹ ہم ورندی جمع کرفنگ کن پین وخت خواہس۔ جمعیت علماء اسلام نورانی موقف اختیار کرے کہ ننا اومیت دارآک الیکشن اٹی بشخ ہی التنو، کاغد آتے پدی ہلکوسر، نن تینا اومیتدار ءِ پیپلزپارٹی نا حق اٹی دزکش کریسن۔ ننا 14 اومیتدار ئسر ہرافتے ٹی اسہ زالبول اس ئس، ولے غٹ کاغد آتے پدی ہلکوسر۔ ممبر کمیشن پارے کہ نی تینا نوشتہی بیان ءِ ، بیان حلفی اتون جمع کرف۔ پاکستان نظریاتی پارٹی نا وکیل موقف اختیار کرے کہ ننا 63 اومیتدار ئسر، پنجاب اٹی ننا زیات اومیتدار ئسرہراڑے نن زالبول آتے کوٹہ تسن، ایلو صوبہ غاتیٹی ننا اِرا مسہ اومیتدار ئسر ہراٹی کوٹہ متوکہ ہی۔ ممبرکمیشن پارے کہ زالبول آتے پنچ درسد جنرل نشست آتیا ٹکٹ ناکوٹہ تننگ نااطلاق کرین سینیٹ آہم ارے، الیکشن ایکٹ اٹ زالبول آتے 5 درسد جنرل نشست آتیا ٹکٹ تننگ نا باندات آ لوز پارلیمنٹ و صوبائی اسمبلی کاریم اٹ اتنگا۔ ممبر کمیشن پارے کہ دا باندات آہم ننے سرجمی اٹ معلومدار کیر، جماعت اسلامی، عوامی نیشنل پارٹی، جمعیت علماء اسلام پاکستان امام نورانی، پاکستان عوامی تحریک، پاکستان راہ حق ، جمعیت علماء اسلام (س) انا کنڈآن ہچ کس پیش متو۔ الیکشن کمیشن نوٹس دُوارہ جاری کرے، کیس انا سماعت ءِ 7 اگست اسکان پدبٹنگا۔