فرٹیلائزر کمپنیک ملک انا ہر ضلع ٹی بزغرآتا آسراتی کن ماڈل سینٹر آتا بناءِ کیرہ، بنجائی وزیر رانا تنویر حسین

اسلام آباد۔ 25 جولائی (اے پی پی) بنجائی وزیر صنعت و پیدوار رانا تنویرحسین پارینے کہ فرٹیلائزرکمپنیک ملک انا ہر ضلع ٹی بزغر آتا آسراتی کن ماڈل سینٹر آتا بناءِ کیرہ، بزغرآتا آسراتی و کشاری شونداری کن کھد کمپنی تا کنڈآن ہرضلع ٹی ماڈل سینٹر ملنگک۔ داخیال آتا درشانی ءِ او پنچ شنبے نادے آ تینا کماشی ٹی مروک آ فرٹیلائزر  ریویو کمیٹی نا دیوان آن تران کرسا کرے۔ جاری اعلامیہ نا رداٹ دیوان نا مسخت ملک اٹی کھد انا سٹاک نا دستیابی و نہاد آتا جاچ ءِ ہلنگ ئس۔ بنجائی وزیر رانا تنویرحسین پارے کہ بزغرآتا آسراتی و کشاری شونداری کن کھد کمپنی تا کنڈآن ہرضلع ٹی ماڈل سینٹر ملنگک، بزغر آک سینٹر آتیا اصل نہاد آ کھد آتے ہلنگ کیرہ، حکومتی گام آن ایجنسی و ڈیلرآتا ہیراپھیری چٹک۔ اوپارے کہ فوجی فرٹیلائزر کمپنی تدوک آ ہفتہ منہ ماڈل سینٹر آتا بناءِ کرینے، اینگروفرٹیلائزر کمپنی اولیتی بنداوتیا ماڈل سینٹر آتا جوڑ کننگ نا سلاہ شیئرکرے۔ بنجائی وزیرپارے کہ حکومت مڈل مین و ایجنسی تا دوتے اٹ بزغرآتا استحصال ءِ مننگ کن اِلیپک۔ اوکوڑی کننگ و نہاد آتیٹی ہیراپھیری آ صوبہ غاتےسخت ایکشن ہلنگ نا پارت کرے۔ کمیٹی نا کنڈآن فرٹیلائزر نا اسٹاک اویلیبلٹی آ است جمی نا درشانی ءِ کننگا۔