اسلام آباد۔25جولائی (اے پی پی):جرمنی ءَ پاکستانی سفارت خانہ ءِ سرءَ زھر شانی کنوکیں مردمانی اُرشءُ راجی بیرک ایر کنگءِ وئیلءِ حلاپءَ بنجاہی باسکانی نیمگءَ چہ ”حرمت پرچم“ مہم بندات کنگ بوتگ، بنجاہی وزیر آں پاکستانی بیرکءِ ہمراہیءَ عکس سوشل میڈیاءِ سرءَ شنگ کتگ اَنت۔ بنجاہی وزیر آں سوشل میڈیا ءِ سرءَ راجی بیرک ءَ گوں مہرءُ محبت ءِ کلوہ نبشتہ کتگ اَنت۔ نائب مزن وزیرءُ دری کارانی وزیر اسحاق ڈار، بنجاہی وزیر سردار اویس لغاری، عبدالعلیم خان، رانا تنویر ، عطااللہ تارڑ ءَ ہوار ایندگہ وزیرآں ہم راجی بیرک ءِ ہمراہی ءَ وتی عکس سوشل میڈیاءَ شنگ کتگ اَنت۔ حالءُ اھیوال کاری ءِ بنجاہی وزیر عطااللہ تارڑ ءَ ”چاند روشن چمکتا ستارہ رہے، سب سے اونچا یہ جھنڈا ہمارا رہے“، پاکستانءِ دژمن آناں ترندیں کلوہ ءِ گوما سوشل میڈیا ءِ سرءَ عکس پوسٹک کتگ۔ ہمے وڑا ڈاکٹر مصدق ملک ، علی پرویز ملک ءُ جام کمال خانءَ ہم راجی بیرک ءُ ”پاکستان زندہ باد“ ءِ کلوہ ءِ گوما عکس شنگ کتگ اَنت۔ بنجاہی وزیر عطااللہ تارڑ ءَ اے موہ ءَ گشتگ کہ سیاسی کارکن، صحافی، زانت کار، راہ دربر ، وکیل ، ڈاکٹر، دھکان، پوریاگر ، راہ در، بیپاری مردم ، ڈنی ملک وطن دوستیں پاکستانی ءُ پاکستانی ورناہ ”حرمت پرچم مہم“ ءِ بہر جوڑ بہ بنت۔ آئیءَ گشتگ کہ پاکستان ءِ بیرک مئے راجی پجار ء ُ وت واجہی ءِ چیدگ ایں، پاکستانی بیرک راج ءِ محکمی ءُ یکوہی ءِ نمائندگی ءَ کنت۔ آئیءَ گشتگ کہ اگست پاکستان ءِ آجوہی ءِ ماہ اِنت، ”حرمت پرچم“ بزاں بیرک ءِ شرپ ءِ اے مہمءَ را دیما برآں، بیرک ءِ شرپ کنگ مئے راجی زمہ واری ایں ءُ ہمک پاکستانی ءِ فرض ایں کہ آ اے ایشی ءِ رندگیری ءَ بہ کنت۔ اے گپ زانگ بہ بیت کہ سوشل میڈیا ءِ سرءَ بنجاہی وزیر آنی ”حرمت پرچم“ مہم ءَ را سک باز ساڑاھگ بوہگءَایں۔
