اسلام آباد۔ 24 جولائی (اے پی پی) الیکشن کمیشن سیاسی جماعت آتا کنڈآن گچین کاری خڑچ آتا سرجم آتے جمع کرفپننگ نا کیس آ فیصلہ ءِ ڈک کرے۔ سے شنبے نادے آ گچین کاری خڑچ آتا سرجم آتے جمع کرفپننگ نا باندات ناسماعت ءِ ممبر نثار درانی نا کماشی ٹی چار باسکی بنچ کرے۔ عوامی نیشنل پارٹی، مووان پاکستان، پیپلز مسلم لیگ پاکستان ، پاکستان عوامی راج، عوامی جمہوری پارٹی پاکستان، حق دو تحریک بلوچستان، پاکستان پیپلزلیگ گچین کاری خڑچ آتا سرجم آتے جمع کرفتنو ۔ اے این پی نا میاں افتخار و حسین شاہ تون بھاز وار رابطہ کننگا ولے جماعت عملدرآمد اٹی بے سہب مس، مووان پاکستان تون اونا نمبرآتیا رابطہ نا کوشست کننگا ولے رابطہ مننگ کتو۔ پیپلز مسلم لیگ پارے کہ او الیکشن اٹی بشخ ہلتنے۔ ہنداسو ب آن خڑچ متنے۔ حق دوتحریک بلوچستان پارے کہ او28 جون آ سرجم آتے گدریفے ولے او موصول متنو۔ کمامدارآک پاریر کہ گچین کاری تیٹی تو پارٹیک اشتہار تسر کہ ہرااومیتدار ءِ ٹکٹ ہلوئی ءِ او خواست کے۔ 149 جماعت آک گچین کاری تیٹی بشخ ہلکر و اوفتے الیکشن کمیشن گچین کاری نشان تس، 7 جماعت آک داسکان الیکشن خڑچ آتا سرجم آتے جمع کرفتنو، گڑاس جماعت پاننگ ءُ کہ نن مہم چلیفتنون تو نن انت اکن سرجم آتے جمع کرفن، دا جماعت آک گچین کاری نشان ہلکر، دا جماعت آک انت اکن گچین کاری نشان ہلکر، آزاداومیتدار آتون پارٹی ٹی شمولیت کن مسہ دے مسکہ داسہ پانزدہ دے مسنے، داسہ کانود توہنا۔ کمامدارآک پاریر کہ گچین کاری خڑچ جمع کرفپننگ آ دا 7 جماعت آتیان گچین کاری نشان بایدے واپس مرے۔ ممبر کمیشن پارے کہ نن اوفتے آخریکو شوکاز نوٹس ایتنہ۔ کمامدارآک الیکشن کمیشن پاریر کہ دا جماعت آتے مہالو آن شوکاز نوٹس تننگانے۔ سردار رضاپارے کہ 2018 نا گچین کاری تیان پد ہراجماعت آک خڑچ آتے جمع کرفتنو اوفتا گچین کاری نشان تے پدی ہلنگ اسٹ انگا کسر ءِ، الیکشن کمیشن فیصلہ ءِ ڈک کرے۔
