اقوام متحدہ۔ 24 جولائی (اے پی پی) پاکستان جہانی برادری آ زور شاغانے کہ او جم چاگڑدی نظام اٹی اونا کڑد انا رداٹ گڈانا رکھ اکن اسیجائی کوشست آتا مخ تفی ءِ کے۔ اقوام متحدہ ٹی پاکستان نا آخبتی مندوب منیر اکرم اقوام متحدہ نا چاگڑدی پروگرام یواین ای پی و یونین فارکنزرویشن آف نیچر نا کمک اٹ اقوام متحدہ ٹی تاجکستان نا مشن نا کنڈآن اڈ ہلوک دود آن تران کرساپارے کہ پاکستان کن اونا قومی ساہدار مننگ نا حیثیت اٹ گڈ ءِ خاص اہمیت اس ارے۔ پاکستانی مندوب پارے کہ گڈ زرگزران نا مون آ دننگ، رکھ انا کوشست ،پائیدارسیل و سوات و اقتصادی شونداری ءِ مون آ دننگ نا اسہ اہم ءُ موقع اس فراوان کیک وخت اس کہ گڈ انا آبادی جہانی کہول آ کم مننگ ءِ ہراٹی بالغ ساہدار تا کچ 6 ہزار آن کم رہینگانے۔ اوپارے کہ پاکستان اٹی گڈ آتا کچ تدوک آ10 سال آن ودنگ ءِ۔ دا ننا فعال رکھ انا پروگرام و کمیونٹی گورننس نا پنجر ءِ سوگو کننگ و قدرتی وسیلہ غاتا پائیدار کاریم اٹ اتنگ آ ہندی ملکیتءِ مون آ دننگ جنگلی حیات نا بست وبند نا سرجزآتیکن پین لائخی ودی کننگ کن اسہ اہم ءُ گام اسے۔ اوداچرجوئی ٹی پاکستان نا ’’ٹرافی ہنٹنگ پالیسی‘‘ یعنی’’ساہدار تا شکار نا پالیسی‘‘ نا حوالہ تس ہرانا رداٹ بنائی وڑاٹ 6 و اوکان پد 12 گڈ آتا شکار نا کوٹہ نا موکل تننگا، داپروگرام جنگلی حیات و نباتات نا خطرہ غان دوچار چین تیٹی جہانی واپار نا کنونشن (سی آئی ٹی ای ایس) نا رداٹ امنا مروک پروگرام ءِ۔ پاکستانی مندوب پارے کہ اونا شڑت آتا رداٹ ہندی کمیونٹی تے گڈ آتا آبادی و جنگلی حیات نا رکھ انا مون آ دننگ و ساہدار تا شکار نا چاروکی و بست وبند کننگ نا تربیت تننگک۔ داکمیونٹیک ٹرافی پرمٹ فیس انا 80 درسد تینتون تخرہ، ہراڑان رکھ اکن سوگو ترغیب آتے مون آ دننگک، ہراڑآن معاش اٹی نمان گچینی و کمیونٹی ڈویلپمنٹ پروجیکٹ مریک ، ہراڑآن دوئی مروک آ زر گڈ آتا افزائش نا جاگہ و ہنکین تے ودفنگ آہم خڑچ مریک۔ اوپارے کہ پاکستان گڈ آتا رکھ اٹی تینا علم و آزموندہ ءِ ایلو ملک آتون شیئر کننگ کن تیار ءِ و اوفتیان ہیل کننگ نا چای ءِ۔ منیر اکرم پارے کہ اقوام متحدہ نا جنرل اسمبلی نا قرارداد، ہراٹی 24 مئی آ گڈ آتا جہانی دے انا وڑاٹ اڈتننگ نا پڑو کننگانے، دا پنی آ نو ع و اونا مسکن نا مریس مدی رکھ اکن اسیجائی کوشست آتے مون آ دننگ اٹ کمک کیک۔
