اسلام آباد۔ 24 جولائی (اے پی پی) وزیراعظم محمد شہباز شریف ملک اٹی دہشت گردی نا ساڑی آ ریسہ غا است ہسونی نا درشانی ءِ کرسا پارینے کہ داپاکستان نا برخلاف اسہ سجفوک ءُ سازش اسے، بدبختی اٹ تحریک طالبان پاکستان اوغانستان نا گل زمین پاکستان نا برخلاف دہشت گردی ٹی کاریم اٹ اتنگ ءِ، نن تینا شاری تا رکھ اکن پورو وڑاٹ تیار اُن، نن خوانہ کہ باندات آک امن ومذاکرات اٹ طے مریر، ڈیہہ اٹی امن آن ہی شونداری و شونہالی بریک، 9 مئی آ پاکستان نا بنداوتے سُرفنگ اٹی اوار ٹولہ پاکستان نا پرامن شاری و پاک فوج انا برخلاف ءُ و چندی چم آتے اٹ پوسکن ءُ واردات کننگ ءُ، ہرافتے ہچ ءُ حالیت اسے ٹی سگپنہ۔ سے شنبے نادے آ بنجائی کابینہ نا دیوان آن تران کرسا وزیراعظم پارے کہ فلسطین اٹی است ہسون ظلم کننگ انگ ءِ و 40 ہزار فلسطینی تے بے دردی اٹ شہید کننگانے ہرافتے ٹی ہزار آچناک اوار ءُ، دااست ہسون و بدترین ظلم انا ساڑی آ دور اٹی درورملیپک۔ سلامتی کونسل نا منظور مروک قرارداد و جہانی عدالت انصاف نا کنڈآن داعمل ءِ بدترین ظلم ا س گوندنگا ولے مجال ءِ اسرائیلی حکومت آ اونا زرس ہم اثربروئے۔ ہراتم پوسکن ءُ قرارداداس منظور کننگک اسرائیلی ظلم ہنداخہ ہی ودک داظلم آتا اخس مذمت ءِ کننگے کم ءِ۔ اوپارے کہ آستانہ ٹی ایس سی او کانفرنس اٹی اسرائیلی جارحیت نا باندات ءِ پبی وڑاٹ ہرفین۔ ایلو اسلامی ملک آک ہم ایس سی او نا پلیٹ فارم آن داویل ءِ تالان کریر۔ اوپارےکہ بدبختی اٹ جرمنی تون اوار ایلو ملک آتیٹی نناسفارت خانہ غاتیا جلہو کننگا، داافسوزناک واقعہ غاک ءُ، وزیرخارجہ دانا دمدستی نوٹس ءِ ہلکنے۔ تینا سفارت خانہ غاتارکھ ننا زمواری ءِ۔ تعلقدار ملک آتا سفیر آتے بٹنگسا اوفتے تون ترند برانز کننگے، سفارت خانہ وعملہ نا رکھ ءِ پک کننگ مہماندار ملک انازمواری ءِ۔ وزیراعظم پارے کہ حکومت کاروبار اٹی آسانی ودی کننگ کن پورو وڑاٹ کوشست کننگ ءِ دابابت وزارت داخلہ و تعلقدار وزارت و کمامدارآک اسہ بھلو گام اس ہرفسا ویزہ رجیم اٹی بھلو بدلی اس کرینو، داڑآ غٹ مبارکباد نا حقدار ءُ۔ اونا رداٹ 126 ملک آتیان پوریاگر، ٹریولزو سیل و سواتی تیان ویزہ فیس ہلنگ پننگک۔ داڑآن پیشن نا زرکاری ودک، اونا گڈیکو منظوری ءِ کابینہ ایتک، ویزہ پالیسی ٹی نرمی نا فیصلہ غان پاکستان پیشن آن بروک آتیکن پرکشش ہند اس جوڑ مس۔ اوپارے کہ دا اسہ بھلو فیصلہ اسے و او داٹی اوار غٹ ءِ خراج تحسین پیش کیک۔ اوپارے کہ داڑتون الیکٹرانک فارم نا کمک اٹ 24 گھنٹہ ٹی ویزہ ملک۔ وزیراعظم پارے کہ ملک اٹی بالی پٹ آتیا ای گیٹس اس جوڑ کننگ انگ ءِ، گوادر تون اوار 9 بالی پٹ آتیا دانابناءِ کننگک ، اولیکو ریسہ ٹی کراچی ، لاہور و اسلام آباد اٹی ای گیٹس نا بناءِ کننگک۔ اوپارے کہ داعمل آن مذہبی سیل و سوات ءِ مون آدننگک و پاکستان اٹ گچین مذہبی ہند ساڑی ءِ ، قطبی علاقہ غاتیٹی ہم گچین سیل وسواتی ہند آک ءُ و داگام آن ہموڑے ہم سیل و سوات ءِ مون آدننگ ملک۔ داگام آن زرگزران سوگو مریک، زرمبادلہ نا کوڑی تیٹی ودکی مریک۔ اوپارےکہ سیوتی حکومت ءِ زرگزرانی چیلنج مون تروک ءِ ، کوشست کننگ ننا فرض ءِ ، خواری و لگن اٹ کاریم کرین تو نتیجہ است بڈ مریک۔ اوپارے کہ آئی ایم ایف تون سٹاف لیول معاہدہ کرینن داسہ اونا منظوری ءِ بورڈآف گورنرز ءِ تروئی ءِ۔ بجٹ اٹی زور ئس، چیلنج مون تروک ءِ، نن تینا بجٹ اٹی کٹوتی کرسا حقدار بجلی صارف آتے 50 ارب روپئی نا سبسڈی تسونن۔ اوپارے کہ اجتماعی کوشست آتیان مخلو ط حکومت مون تروک چیلنج آتا مون ءِ توننگ اٹ سرسہب مننگ اٹی ءِ، زرگزرانی چیلنج آتون مون تننگ کن غٹ اسٹیک ہولڈر آک اواری اٹ تینا کڑد ءِ اداکیر۔ اوپارے کہ ساڑی آدے تیٹی خیبرپختونخوا و بلوچستان تون اوار ملک اٹی دہشت گردی نا واقعہ غاتیٹی ودکی مسنے۔ بھلو کچ اسے ٹی سیکورٹی کارندہ غاک تینا جون تے ندر کرینو۔ داپاکستان نا برخلاف اسہ سجفوک ءُ سازش اسے۔ دہشت گردی نا ریسہ قابل افسوز ءِ داٹی گڑاس ہمسایہ ملک آتا گل زمین استعمال مننگ ءِ۔ دابابت اوفتے تون چندی فورم تیان ہیت مسنے۔ نن 40 سال آن اوفتا پناہ گزین آتا مہمانداری ءِ کننگ اُن ، او ننا ایلمک ءُ اوداڑے رہینگر، حالیت سازگار مننگ آ پدی کارہ۔ ولے مہمانداری نا بدلہ ءِ دا تننگ انگ ءِ کہ اوفتا گل زمین آن ٹی ٹی پی پاکستان نا برخلاف دہشت گردی کے تو دا قابل قبول اف، نن تینا شاری تا پورو رکھ ءِ پک کننگ کن تیار اُن ولے نن خوانہ کہ گپ وتران اٹ ویل ایسر مرے، نن امن اٹ رہینگن۔ داڈیہہ اٹی امن مریک تو شونداری و شونہالی مریک۔ ننا ورناک بھلو قربانی تسنو اوفتا قربانی تے روشنا لوز آتیٹی یات تخنگک۔ وزیراعظم پارے کہ نن ہر وڑنا حالیت آتا مقابلہ ءِ کننگ کن تیار اُن۔ وزیراعظم پارے کہ 9 مئی آ اسہ ٹولی اس داملک اٹی ہڑدڑ کریسس و پاکستان نا ماس تے خورک کننگ اٹ ہچ ءُ کسر اس التویسر۔ غٹ انا علم اٹی ءِ کہ مستین اٹ او پارلیمنٹ و پی ٹی وی آ جلہو کریسر۔ وزیراعظم ہاؤس نا دامون ایمون اوفا جتھ آک بسوسر، اینو ہموفک پاکستان نا برخلاف پوسکن آ چم آتے کاریم اٹ اتنگ ءُ، پاک فوج انا برخلاف منظم پروپیگنڈا کننگ انگ ءِ۔ آرمی چیف و اونا خاہوت ءِ سوشل میڈیا غا ٹارگٹ کننگ انگ ءِ، دا دے منپنہ، سلہہ بند فوج ننا سیم تا رکھوک آءِ، اوتینا دتراٹ وطن نا آبیاری ءِ کرینو و جون ءِ دلدست آ تخسا سیم تا رکھ ءِ کرینو۔
