اسلام آباد۔23جولائی (اے پی پی): مزن وزیر محمد شہباز شریف ءَ سروکیں فلسطین گروپ آنی نیام ءَ یکوئی ءُ تپاکی ادارکی حکومت ءِ جوڑ کنگ ءِ واستہ بیجنگ جار ءَ را وش اتک کتگ۔ سئے شمبے ءِ روچ ءَ سوشل میڈیا پلیٹ فارم ایکس ءِ سر ءَ پوسٹ ءَ آئی ءَ گوشت کہ اے ارزشتی ایں کامیاتی ءِ پد ءَ السی جمہوریہ چین ءَ را ساڑاتگ۔ آئی ءَ گوشتگ کہ فلسطینی الس آں دراج بریں ساھتے ءَ چہ درد ءُ سکی ءَ ابید اچ نہ دیستگ ءُ مرچی منوگری ءَ چہ امیت پیداک بوتگ کہ مھکمیں ایمنی در جنگ بوت کنت۔ مزن وزیر ءَ سرجمیں دگنیا ءَ را زور پر دات کہ آ فلسطینی الس آنی گوما ھمگام ءَ بہ اوشتنت ءُ آئی ءَ اسرائیل ءِ سر ءَ زور پر دات کہ آ وتی زلم ءُ زوراکی ءَ را ھلاس بکن انت۔ ایشی ءَ چہ غزہ ءَ را تباہ کنگ بوگ ءُ گوستگیں 10 ماہ ءِ ساھت ءَ 40 ہزار ءِ کساس فلسطینی آناں کشگ بوتگ۔ آئیءَ گوشت کہ پاکستان فلسطین ءِ کاز ءِ واستہ وتی جزم ءِ درشان ءَ کنت۔ ءُ 1962 ءَ چہ پیسر یگیں سیم سر آنی رد ءَ آزات فلسطین ریاست ءِجوڑیشت ءِ واستہ دو ریاستی گیواری ءِ سر ءَ تپاک کنت ایشی ءَ چہ دارالحکومت القدس الشریف بہ بیت۔ شہباز شریف ءَ گوشت کہ فلسطین ءِ ٹولی آنی نیام ءَ وت مہ وتی یکوئی، ایمنی ، انصاف ءُ ریاست ءِ درجہ ءِ واستہ مھکمیں ءُ جوانیں گوانک المی انت۔ آئی ءَگوشت کہ ما فلسطینی الس آنی وت واجئی ھک ءِ واستہ آوانی گوما ھمگام ءَ اوشتاتگ انت۔
