اسلام آباد۔ 23 جولائی (اے پی پی) وزیراعظم محمد شہباز شریف پارینے کہ پاکستان کشت وکشار نا بشخ اٹی چین نا سرسہبی آن فائدہ ہرفنگ نا خواہندار ءِ، گوادر فری زون اٹی بنداوی آسراتی تا بے سلنگ آن فراوانی ءِ پک کننگے۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِاو چیئرمین زھانگ بن نا کماشی ٹی چینی کمپنی ہینگینگ ٹریڈنگ کمپنی نا ڈل اتون گپ وتران کرسا کرےہرا سے شنبے نادے آ داڑے اوڑتون اوڑدہی کرے۔ وزیراعظم پارے کہ پاکستان اٹی چینی زرکاری ءِ بخیر اٹ پانہ۔ اوپارے کہ کنا ساڑی آ دورہ ءِ چین اٹی پاکستان و چین نا کمپنی تا نیام اٹ بھلو کچ اسے آ بزنس ٹو بزنس معاہدہ طے مس ہراکہ بھاز ستاکڑزک۔ اوپارے کہ پاکستان کشت وکشار نا بشخ اٹی چین نا سرسہبی آن فائدہ ہرفنگ خواہک ۔ وزیراعظم گوادر پورٹ اتھارٹی ءِ چینی کمپنی تے ہرممکن آسراتی تننگ و گوادر فری زون اٹی یوٹیلیٹی تا بے سلنگ آن فراوانی ءِ پک کننگ نا پارت کرے۔ ڈل وزیراعظم ءِ حوال اٹی پارے کہ ہینگینگ ٹریڈنگ کمپنی پاکستان اٹی کشت وکشار، لائیو اسٹاک ، دوائی و ایلو بشخ آتیٹی زرکاری کننگ ءِ ہینگینگ ٹریڈنگ کمپنی 50 ملین ڈالر نا خڑچ آن گوادر اٹی پوسکن آ آسراتی تیان شپ ذبحہ خانہ (سلاٹر ہاؤس) تفنگ انگءِ، سلاٹر ہاؤس نا پوروی آن پاکستان نا لائیو اسٹاک نا بشخ آن چین ءِ 30 ملین امریکی ڈالر اسکان سالانہ نا برآمدات مریک، سلاٹر ہاؤس اٹی ہندی مخلوق کن اسہ ہزار نا خڑک پوسکن ملازمت آتا وارخواہی ودی مریک۔ حوال اٹی وزیراعظم ءِ پاننگاکہ ہینگینگ ٹریڈ کمپنی فارماسیوٹیکل مصنوعات ءِ گوادری فری زون اٹی پراسیس کرسا چین ءِ برآمد کننگ ءِ۔ داوخت آ بنجائی وزیر اقتصادی امور احد خان چیمہ ، بنجائی وزیر قومی غذائی رکھ و پٹ وپول رانا تنویر حسین ، وزیر مملکت خزانہ علی پرویز ملک و تعلقدار بڑزکو سرکاری آفیسر آک ہم ساڑی ئسر۔
