اسلام آباد۔ 23 جولائی (اے پی پی) وزیراعظم محمد شہباز شریف پاکستان و ترکمانستان نا نیام اٹ واپاری ، اقتصادی، زرکاری و دودوربیدہ ئی تعلقداری تے ودفنگ نا گرج آ زور شاغسا ترکمانستان نا کمپنی تے پاکستان اٹ زرکاری نا سلہ خلکنے۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہبا زشریف تون ترکمانستان نا کابینہ نا ڈپٹی چیئرمین ووزیرخارجہ راشدمیریدوف سے شنبے نادے آوزیراعظم ہاؤس اٹی اوڑدہی کرے۔ وزیراعظم ترکمانستان نا عظیم راہشون قربان گلی بردی محمدوف تون داتُو انا بناٹی آستانہ ٹی مروک آ اوڑدہی نا ذکر ءِ کرسا پارے کہ ا واونا پاکستان اٹی بخیرءِ کننگ نا چاری ءِ۔ وزیراعظم ہڑتوم آ وزیرخارجہ غاتا کماشی ٹی پاکستان وترکمانستان نا نیام اٹ ہڑتوم آکنڈآتا سیاسی سلابت نا مسٹ میکو دور انا اڈتننگ آاست جمی نا درشانی ءِ کرے و ہڑتوم آ ملک آتا ادارہ غاتا دا عمل اٹ باقاعدہ شمولیت نا اہمیت آ زور شاغا۔ اوپاکستان و ترکمانستان نا نیام اٹ واپاری، اقتصادی، زرکاری و دودوربیدہ ئی تعلقداری تے ودفنگ نا گرج آ زور شاغسا ترکمان کمپنی تے پاکستان اٹ زرکاری نا سلہ خلک۔ وزیراعظم درملکی زرکارآتے چندی بشخ آتیٹی کمکاری و رابطہ نا اہمیت ءِ ہم تالان کرے و تاپی گیس پائپ لائن و ایلو ڈٹ آتا زوت پوروی کن پاکستان نا پکا عزم انا درشانی ءِ کرے۔
