اسلام آباد۔ 23 جولائی (اے پی پی) وزیراعظم شہباز شریف ملکی برآمد آتا سالانہ 60 ارب ڈالر اسکان سرکننگ نا ہدف ترسا پارت کرینے کہ برآمد کروک آتا ویل آتے اِراہفتہ ٹی ایسر کننگے۔ وزیراعظم آفس نا میڈیا ونگ آن جاری بیان نا رداٹ داپارت ءِ وزیراعظم سے شنبے نادے آ تینا کماشی ٹی قومی شونداری برآمدات بورڈ(National Export Development Board)نا دیوان اٹی تس۔ دیوان اٹی نائب وزیراعظم و وزیرخارجہ اسحاق ڈار، بنجائی وزیر جام کمال خان، احدخان چیمہ ، قیصر احمدشیخ، عبدالعلیم خان، احسن اقبال ، رانا تنویر حسین، محمد اورنگزیب، سردار اویس خان لغاری، ڈاکٹر مصدق ملک، وزیر مملکت علی پرویز ملک، شزہ فاطمہ خواجہ، ڈپٹی چیئرمین پلاننگ کمیشن جہانزیب خان، گورنر اسٹیٹ بینک، وزیراعظم نا کوآرڈینیٹر رانا احسان افضل چیئرمین ایف بی آر، تعلقدار آفیسر و بھلو کچ اسے ٹی چندی بشخ بشمول، ٹیکسٹائل ، انفارمیشن ٹیکنالوجی ، لیدر ، کشت وکشار تون تعلق تخوک آ برآمدکنندگان آک بشخ ہلکر۔ بشخ ہلوک آک برآمدی صنعت آ خاص چکار کننگ آ وزیراعظم نا منت واری ءِ ہرفیر۔ دیوانءِ حکومت نا کنڈآن برآمدی صنعت نا مون آدننگ کن کروک آ گام گیج آتیا حوال تننگا۔ دیوان ءِ پاننگاکہ برجاسال پاکستان نا برآمدآک 30 ارب ڈالر آن گدرینگار ہرافتے اِرا ہنداخہ کننگ کن بروک آ پنچ سال نا ڈٹ پیش کننگا۔ دیوان اٹی وزیراعظم شہباز شریف ملکی برآمد آتے 60 ارب ڈالر سالانہ غا سرکننگ نا ہدف تس۔ وزیراعظم پارے کہ وزارت واپار و تعلقدار ادارہ غاک بروک آ مسہ سال اٹی برآمد آتا 60 ارب ڈالر نا ہدف کن عملی گام گیج کیر۔ الحمداللہ تدوک آ مالی سال ملکی برآمد آک 30 ارب ڈالر آن زیات ئسر، حکومتی پالیسی تا سوب آن انفارمیشن ٹیکنالوجی برآمد آک 3.2 ارب ڈالر آن گدرینگار ہراستاکڑزوک ءُ ہیت اسے۔ وزیراعظم پارت کرے کہ برآمد کروک آتا پیدوارکروک ویل آتے بروک آ اِراہفتہ ٹی ایسر کرسا رپورٹ پیش کننگے۔ وزیراعظم پارے کہ ہر یک و نیم تُو آن پد قومی شونداری برآمدات بورڈ انا دیوان نا تینٹ کماشی ءِ کیوہ۔ پاکستان نا شونداری کن غٹ ءِ خواری کروئی مریک۔ مشکل حالیت آتیان پد ہم پاکستان نا برآمد آتے ودفنگ اٹ تینا کڑد ءِ ادا کروک کاروباری شخصیت و زرکارآتے سلام پیش کینہ۔ وزیراعظم پارت کرے کہ وزارت واپار برآمد آتا کچ تخوک آ بشخ آتا نمائندہ غاتون اواری اٹ پالیسی سلاہ تے گڈیکو دروشم اس ایتے، کشاری برآمد آتیٹی پین ودکی کن وزارت قومی غذائی رکھ صوبہ غاتون اواری اٹ ایکسٹینشن سروس آتا گچینی کن کاریم کے۔ اوپارے کہ آب اٹ بِج و کشاری اجناس نا پین پروسیسنگ کرسا اوفتا برآمد آتے پک کننگے۔ کشاری اجناس نا زیات پیدوار والا وڑتے درستی راستی کرفنگ کن گام گیج آتے ترند کننگے۔ وزیراعظم پارت کرے کہ برآمد آتا شپنگ نا بابت ویل آتے دمدستی ایسر کرسا یورپ و امریکہ پاکستانی گڑاتا فراوانی نا وخت ءُ پاس ءِ کم کننگے۔ وزارت واپار زرکاری بورڈ آن چینی برآمدی صنعت آتا پاکستان آ گدریفنگ نا بابت کمکاری ءِ پک کے۔ وزیراعظم پارے کہ پاکستانی گڑاتا برآمد آتیٹی ودکی و اوفتا منفرد پہچان جوڑ کننگ کن ریسرچ اینڈ ڈویلپمنٹ، جدت و برانڈ ڈویلپمنٹ آ کاریم کننگے۔ ایف بی آر نا کنڈآن برآمد کروک آتا ریفنڈزاٹی تعطل ءِ منپنہ۔ وزیراعظم پارت کرے کہ مچ آ دنیاٹی پاکستانی سفارتخانہ غاتیٹی ٹریڈ آفیسر آک دا ملک آتیٹی پاکستانی گڑاتا برآمد و پاکستانی برآمد کروک آ تاراہشونی ٹی تینا کڑد ءِ ادا کیر۔ وزیراعظم پارے کہ صنعت آتیکن بجلی نا خڑچ ءِ کم کننگ کن وزارت بجلی اسہ جوان ءُ ڈٹ اس پیش کے۔ مچ آ دنیا ٹی نجی بشخ ہرملک انا شونداری ٹی اہم ءُ کڑد اس ادا کیک۔ نجی بشخ انا ویل آتا ایسری کن اوفتے پالیسی نا ٹہیفنگ نا عمل نا بشخ کننگے۔ برآمدی صنعت آتا نمائندہ غاک وزیراعظم ءِ ویل آتا ایسری کن تسلسل اٹ اوڑدہی تیا خراج تحسین پیش کرے۔ دیوان اٹی بشخ ہلوک آک پاریر کہ وزیراعظم نا برآمدی بشخ اٹی خاص است خواہی صنعت کار آتیکن است بڈءِ۔ برآمد کروک آک وزیراعظم نا برآمدی صنعت ءِ ایف بی آر نا کنڈآن وخت آ ریفنڈزنا فراوانی نا گام گیج آتا ہم ستاءِ کرے۔
